Narsami isumasioqatigiinnissaq akerliunermik saqqummersitsiniarnerunngilaq
Isumasioqatigiinnermik aaqqisuisup Finn Lyngip erseqqissaatigaa ulluni tulliuttuni oqallinneq akerlilersuiniarfiullunilluunniit illersuiniarfiussanngitsoq.
- Namminersornerullutik Oqartussat tungaaniit oqaatigineqarsimavoq kissaatigineqartoq Narsarmiut pisussat pillugit iluamik qaammassaaffigineqassasut, ilumut Kuannersuit ammaqqinneqassagaluarpat. Taamaakkaluartoq inuppaaluit tamaani massakkut paasititsiniaaneq naammagisimanngilaat, aamma paasisaat annikippallaarput taamaattumik tassa pissusissamisoortutut isigisimavarput inuit assigiinngitsut ilisimannittut katersussallugit oqaaseqartissallugit tassunga atasumik, Finn Lynge erseqqissaavoq.
Isumasioqatigiinnermi peqataasup Jan Jørgensenip erseqqissaatigeqquaa ilisimatoorsuunnginnami, taamaattorli atuakkatigut paasiniaasarnermigut, ujarassiuunik nakorsanillu oqaloqateqartarnermigut ilisimasai annikitsuinnaajunaarsimapput. Taassuma ilisimavaa Kuannersuarni aatsitassarpassuit iluaqutigineqarsinnaasut nassaassaasut, tamanna assortunngilaa. Paarlattuanilli aamma ilisimanerarpaa navianartorpassuarnik nunap sananeqaataani akoqartut.
Unnugu arfineq marlunut Narsami A 21-mi Namminersornerulluni Oqartussani Pisortaasimasoq Kaj Kleist ”Inuiaqatigiinni paasissutissanik siaruarterineq” pillugu oqalugiassaaq.
