Narsami innakkaluartut annaanneqarput
Narsap eqqaani qaqqani ataasinngormat unnukkut marlunngormallu unnuakkut annaasiniartoqarpoq.
Sukorsit pingasut 15-inik 16-inillu ukiullit ataasinngormat aqisserniartut putsiliussaasimapput sumiinnertillu paatsiveerullugu. Oqarasuaammik angallattakkamik nassataqarallartillutik angajoqqaaminnut attaveqarsinnaasimapput, angajoqqaallu politiinut kalerriipput. Air Greenland pujorpallaarnera pissutigalugu timmisartumik ujaasiartortitsisinnaasimanngimmat Narsami qatserisartut ujaasiartorput – sukorsilli nassaariuminaassimaqaat, innaarsuulli illiarnartaani nikeriarsinnaanatik oqarasuaatikkut oqaluttuarsimapput. Sukorsit unnuap qeqqalersoq nassaarineqarput.
Qatserisartut ilaat qaqqap qaanut pisimagaluarlutik innassimasunik tikitsisinnaasimanngillat sermeqarluni quasarpallaaqimmat.
Qatserisartulli allunaasalersorlutik sukorsit angumereqqarlugit tikissinnaasimagaat, Narsami politiit pisortaat Ib Lennart Olsen oqaluttuarpoq.
- Qatserisartut sapiissusertik annaassiniarnertillu pillugu nersualaagassaapput. Inuunertik ulorianartorsiortillugu qaqqap innaa atuarlugu aterlutik sukorsillu qiulertorujussuit tikissimagamikkit.
Sukorsit pingasut seqinnarissuugaa, salallutik gummileiinnarlutik aaqqateqaratillu aqissiliarsimapput.
Sukorsit napparsimmavimmi misissorneqarput annerusumilli ajoqusersimanngitsut, politiit nalunaarput.