Narsami immiorfeqalissaaq

Nunatsinni immiorfiit namminersortunit pigineqartut ilapput, Nuummi imerniartarfimmik Godthåb-imik piginnittut maqitsivitsik ippassaani ammaraallu kujataani namminersorlutik immiorfiutillit aamma ilanngummata.

Immiaaraq Narsami maqitsivimmeersoq, kalaallit Danmarkimiittut Tivolimi aggustip aallaqqaataasiulerpata siullerpaamik tuniniarneqalissaaq. Narsami immiorfik nutaaq ateqarpoq Greenland Brewhouse.

Narsami immiorfiup immiaa Tysklandimut nassiunneqartassaaq, tassani puiaasaaqqanut immiunneqariarluni Danmarkimi tuniniarneqartassalluni.

Immiaaqqallu Narsameersut immiaaqqanik allakkajaanik nunani allani imerusuttunut aamma tuniniagaalernissaat siunertaavoq.

Narsami immiorfissamik pilersitsiniarnermi sulissutiginnittuuvoq, kujataani takornariartitsiqatigiiffimmi pisortaasimasoq Salik Hard suleqataalu Steen Outzen.

- Taama immiorfeqarnissap imminut akilersinnaanissaa pillugu oqartussat paasitinniarnerat ajornaatsuusimanngilaq, massakkulli tassa iluatsippoq, tunisassiornermilu immiaaqqat assigiinngitsut marluk aallaqqaammut tunisassiarineqassapput, Salik Hard oqarpoq. Immiaaqqat assigiinngitsut marluk tunisaalersussat ateqarput Brown ale aamma Pale ale.

Narsami Greenland Brewhousep immiai sermip ernganit maqitaassapput. Sermimernillu immiornermut atugassat Narsami aalisartunit ikiorteqarluni aaneqartassapput.