Narsami immiaaqqat karsit 23-it tillinneqartut

Inuusuttut sisamat Narsami pingasunngornerup sisamanngornerullu unnuaani umiarsualivimmi immiaaqqanik karsinik 23-inik tillissimasut Qaqortumi tallimanngormat tigusarineqarput.
septembarip 13-at 2010 09:47

Sisamanngormat ullaakkut Narsami politiit kalerrinneqarput umiarsualivimmi immiaaqqat karsit 23-it, katillugit immiaaqqanik 460-inik imaqartut tillinneqarsimasut.

- Politiit misissuineranni pasitsaanneqarpoq immiaaqqat umiatsiamik aaneqarsimassasut, Oluf Biilmann Narsami politiit ulluinnarni aqutsisuat oqarpoq.

Kingorna umiatsiaaraq tillinneqarsimasoq politiinut nalunaarutigineqarmat, politiit taanna ujartippaat. Aqaguanilu umiatsiaq Qaqortumi asfaltileriffiup eqqaaniittoq nassaarineqarpoq. Umiatsiami immiaaqqat sinneri 193-it nassaarineqarput.

Qaqortumi politiit takunnissimasunik oqaloqatiginnereerneranni angutit sisamat, 20 - 25 akornanni ukiullit tigusarineqarput.

- Tilliffimminnut Royal Arctic Linemut akiliisussanngortinneqassapput, tillinniarsimasutullu unnerluutigineqassallutik, Qaqortumi politeeqarfimmi politeeq, Erik Rasmussen, oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq