Narsami borgmesteri: Narsaq pilliutigineqarpoq

Royal Greenlandip raajat akii pillugit saqitsaannermi Narsaq pilliutigaa.

Taama isumaqarpoq Narsami borgmesteri Kiista P. Isaksen, Royal Greenlandip Narsami raajanik tunisisinnaaneq aasartinnagu matuniarlugu nalunaarutigigaalu.

Poorskip aappaani Narsap kommunia Royal Greenlandimit allagarsivoq qulequtaqartumik “Narsami suliffissuup siunissaa”. Tassani atuarneqarsinnaavoq aasartinnagu suliffissuup raajanik pisisarnini unitsissagaa, tamanna imminut akilersinnaanngimmat.

Narsamili borgmesterip Kiista P. Isaksenip tamanna akuersaarsinnaanngilluinnarpaa. Taanna isumaqarpoq, KNAPK-p Royal Greenlandillu saqitsaannerat tassannga aallaaveqartoq, isumaqarporlu tamanna pissusissamisuunngilluinnartoq:

-Kommunalbestyrelsimi pisoq akuerisinnaanngilluinnarparput taama pipallataatigisumik raajanik tulaassuineq maani unitsinniarneqarmat. Kommunitsinni akileraarutitigut annertoorujussuarmik sunniuteqassaaq. Sulisut ilaqutaalu eqqarsaatigalugit illoqarfimmilu namminersortut eqqarsaatigalugit akuersaaruminaatsorujussuuvoq, Kiista P. Isaksen oqarpoq.

Kiista P. Isaksen isumaqarpoq Royal Greenlandip KNAPK-lu saqitsaanneranni Narsaq pilliutigineqartoq.

-Isumaqarpunga tassani kalluarneqarnera taputartuunneqartutut oqaatigineqartariaqartoq, taannalu aamma akuersaarneqarsinnaanngilluinnartoq, Kiista P. Isaksen oqarpoq.

Royal Greenlandi allakkamini allappoq, suliffissuup siunissami periarfissarisinnaasai allat misissorneqassasut. Suliffissuarmilu sulisut eqqorneqartussat pikkorissartinneqarnissaat aamma ikiuutaaffiginiarneqartut. Borgmesterilli tamanna akuersaaruminaatsippaa pikkorissaasarnerit kinguneri nalugamikkit:

-Assersuutigiinnarutsigu Aasianni taamatut matusinermi pikkorissaatitsinermi ilinniartitsisoqarluni ingerlatsisoqarmat, naluarput kinguneri suunersut, pissarsiaqaatigineqartullu aamma nalullutigit. Royal Greenlandimit takorluukkersaarutigineqarpoq sulisut 40-t missaanniittut ukiup affap ingerlanerani pikkorissartinneqassasut. Pissusissamisuunngilaq raajanik tunisineq matoqqaariarluni misissuinerit allat ingerlanneqassappata, Kiista P. Isaksen oqarpoq.

Royal Greenlandimit oqaaseqartitsiniaraluaratta iluatsinngilarput.