Narsami atuarfiup allinissaa kinguartinneqaqattaarpoq
-Narsap Atuarfiata allinissaa aserfallatsaalineqarnissaalu ukiut 21-ssaanik Namminersornerullutik Oqartussat kinguartittaqattaarpaat. Taama oqarpoq Atuarfiup siulersuisuini siulittaasoq kinguartitsinermillu nuannarinngilluinnartoq, Ulla Frederiksen Semsen.
Atuarfik ukioq manna suliarineqalertussaagaluarpoq, suliassalli aappaagumut kinguartinneqarlutik.
- 1985-mili aallinissa piumasaqaataalermat, taamatut kinguarteqattaalissappassuk uagutsinninngaanniit akuersaarsinnaanngilarput.
Qassinik atuartoqarnersoq aperigatsinni, akivoq:
-320-it missaannik maannakkut atuartoqarpugut. Klassit angisuut pisariaqartitsipput, taamaalillutik atuarneq taakkununnga kajungernarnerulissammat aammalu ilinniartitsisut atugaat pitsaanerulersinniarneqarput taakkununnga kajungernarnerulissammat. Taamaattumik atuarfiup allinissaata kinguarteqattaanera akuersaarsinnaanngilarput, Ulla Frederiksen Semsen oqarpoq.
Atuarfik allineqaatigaluni iluarsaanneqartussaagaluarpoq. Klassillu ilaanni atuartut amerlavallaartarput.
Taakku eqqarsaatiginerullugit atuarfik iluarsaanneqartussaanerluni, aperaarput:
- Taamaappoq, aamma iluarsarneqarnani sivisuallaaqigami, soorunami sunaluunniit pisoqaliartortarpoq ukiut amerlatsikkiartortillugit, taavalu taamatut kinguartitseqattaassagunik atuarfiup nunguliivinneratigut aatsaat iluarsaassinnaassavaat, taavalu tamanna akisuninngussalluni, Narsap Atuarfiata siulersuisuini siulittaasoq Ulla Frederiksen Semsen oqarpoq.
Atuarfiup ukioq manna suliarineqalernissaa borgmester Kiista P. Isaksen-ip ilimagisimaneraraluarpaa, Namminersornerullutilli Oqartussanit ilisimatinneqarput suliassat kinguartinneqarsimasut.
