Narsami atuarfik nutaaq

Narsami inuit namminneq kajumissutsimikkut ammaanerisigut, naqinnernik ilisarinnissinnaanngitsut atuarfittaarput.

Marit Eliassen 36 –nik ukiulik allassinaanngilaq atuarsinnaallunili. Naqinnernik takunnissinnaanngitsut atuarsinnaanngitsullu Narsami Atuarfiat ullumi aallartippat nalunaaqqullugu kajumissaarneqarsimavoq. Nammineq ilisimasimanngilaa taamaattuulluni.

-Maannakkut paasivara naqinnernik takunnissinnaanngitsunga. Ilinniartitsisutta aallartikkami nassuiaappaatigut, naqinnernik takunnissinnaanngitsut ilai atuarsinnaasartut allassinnaanatilli, aammalu ilai allassinnaallutillu atuarsinnaaneq ajortut. Uangaalluni nuannerpoq paasilerlugu kisimiinngitsunga, Marit Eliassen oqarpoq.

Nangipporlu:

-Naqinnernik takunnissinnaanngitsut inersimasunngorunik saqqummernissamik namminneq sulissuteqarnissaat pingaaruteqarpoq. Aamma angajoqqaat meeqqamik immikkut atuartinneqarnissaanik piumasaqartariaqarput, naqinnernik ilisarinnissinnaanngitsunik ilinniartitsisortaaq Karen Nielsen oqarpoq.

Karen Nielsen København –imi Naqinninnernik ilisarinnissinnaanngitsut Ilinniarfiani, Ordblinde Institutimi, ukiut 20-it sinnerlugit ilinniartitsisuusimavoq, Narsami maanna uinilu najugaqalersimallutik. Taassuma ilinniartitsisooqatigissavai tarnip pissusaanik ilinniagalik, Inersimasut atuarfiata pisortaa aammalu nutserisoq.

Karen Nielsen aamma oqarpoq, naqinnernik takunnissinnaangitsut saqqummernissaminnut sapiuttartut. Amerlasuutigut ajuutertik tamanna ukiorpassuarni isertortarpaat. Isumaqartarput nalunermik taamaallutik, aammami atuartuulernerminni siusissukkut imminut tatiginertik annaasaramikku.

Narsap borgmesteriata Kiista P. Isaksenip aamma pingaartuunerarpaa, naqinnernik takunnissinnaanngitsut atuarsinnaanngitsullu maannangaaq Narsami atuarfiup ullumi aallartinnera iluatsillugu saqqummertariaqartut, periarfissatsialammillu atuilluarniarlutik.

Ilinniarfiup immikkoortua siulleq decemberip naanerata tungaanut ingerlassaaq.