Narsami aalisartut tunisisinnaaqqilernerat isumalluartitsivoq

Narsaq Seafood-ip aalisakkanik pisiortorneq aallartissavaa ataasinngorpat novembarip aallaqqaataani. Aalisakkat fabrikkip tigooraligassai tassaapput: saarulliit, suluppaakkat qalerallillu.

Aalisakkat Eqalugaarsunni aalisakkerivimmi suliareqqitassanngorlugit assartorneqartassapput.

Inuussutissarsiornermut Suliffeqarnermullu ataatsimiititaliap siulittaasua Kalista Lund isumalluarpoq:

- Namminersortup suliniutigaa kusanartorujussuaq, maanna Narsami aalisakkanik tunioraaqqilernissamut periarfissaqaqqilerpoq. Aalisartut najugaqavissut aningaasarsiornissamut periarfissaqartitaalerput, ilutigalugu nunaqarfittatsinni suliffissaqartitsilerluni, Kalistat Lund oqarpoq.

Royal Greenlandip Narsami fabrikkini juulip aallaqqaataani matuaa tunisarineqartartut ikilivallaarsimanerat pillugu. 2009-mimi tunisat ukiup siulianut naleqqiullutik 650 tonsinik ikinnerusimapput.

- Aalisartunut artornarsimaqaaq tunitsivissaarukkamik, taamaattumik neriuutigaara suliniut nutaaq ilassilluassagaat, suliffeqarfillu suleqatigillualerlugu, Kommune Kujallermi Inuussutissarsiornermut Suliffeqarnermullu ataatsimiititaliap siulittasua Kalistat Lund taama oqarpoq.

Royal Greenlandip tunisassiorfia nipisat suaasa tunisaanerisa nalaani siunissami ammasarniarpoq.