Narsami aalisartut siunissartik nalornissutigaat

Raajarniummi ”Qajiitami” inuttat piginneqataasullu ilaqutaat 20-t missanniittut, Royal Greenlandip Narsami raajaleriffia matussappat eqqugaassapput.

Qajiitami 79-eritut angitigisumi naalagaallunilu piginneqataasup Richard Eiframsenip nunarput tamakkerlugu politikkikkut qinikkat isornartorsiorpai.

- Sapinngisamik illersortussaagaluarpaatigut. Uagut sapinngisarput tamaat Namminersornerullutik Oqartussat suliffissuata ajunngitsumik ingerlanissaa suleqataaffigigatsigu, nangipporlu.

- Pissutsit ima sukkatigipput matuvoq matulerpoq, ilaqutariittut eqqarsaatigisaqaarput taavami qanoq iliussaagut? Sumut nuussaagut? Tamattami Alluitsu Paanut tunioraasinnaanngilagut tunisassiorfiata saperunanngikkaluarpaa kisianni umiarsualiveqarnerup tungaatigut tamatta taakaniissinnaanngilagut, Richard Efraimsen oqarpoq. Taassuma nalunerarpaa siunissami ilaquttatillu sumut nuukkumaarnerlutik.

- Tunitsivissat malersorlugit inuuvugut, ukiorlu kingulleq Narsamut nuuppugut tunitsiveqarnera pillugu, oqarpoq.

Taassuma upperinnginnerarpaa Narsaq tunioraasukinnerarlugu oqartoqartarmat. Richard Efraimsen angallataatimini arfineq-marlunnik inuttaqarpoq, taakkulu aamma ilaqutaqarput. Alluitsup Paata umiarsualiviani Qajiitatut angitigisut tulassinnaanngillat taamaattumillu nunaqarfiup avataani kisarsimajuaannarsinnaannginertik Rikkap erseqqissarpaa. Kisaqqajuaannarunimmi ingammik ukiukkut imaq unerisimanngittaqimmat imminnut ajoqusiinnassallutik oqaatigaa.

Inuussutissarsiornermut Suliffissuaqarnermullu Naalakkersuisoq Siverth K. Heilmann oqarpoq, maannakkut apeqqutit assigiinngitsut peqqissaarullugit suliarineqartut, taamaattumik sapaatip akunnerata tulliani aatsaat erseqqissumik qanoq pisoqarnissaanik oqarsinnaalissallutik erseqqissaatigaa.

Judith Hard Peilmann taama ilanngutassiivoq.