Narsami aalisakkeriviup matunissaa aalajangiusimaneqarpoq
Royal Greenland A/S –ip Narsami raajaleriffiup matunissaa Alluitsup Paani unammillerteqalersimaneq pissutigalugu aaliangiusimavaa.
- Raajanik tulaassuineq annikilleriarujussuarsimavoq tamatumunngalu pissutaasut ilagaat raajat ikiliartorsimanerat, Royal Greenland –ip pisortaanera Henrik Leth Narsamiittoq ualimut taama oqarpoq.
Raajanik tulaassuinerup annikilleriarujussuarsimaneranik oqarnera, raajanik tulaassisukittarsimaneranik tunngaveqarnersoq Henrik Leth aperigakku, angerpoq, tassagooq tamannarpiaq pissutigalugu taamatut ingerlaannarnissaminnut aningaasassaaleqilersimapput.
Nangillunilu oqarpoq, qularutiginnginnerarlugu kujataani raajarniarfiusartut qanittuani Narsap avataatigut tulaa ssuisoqarsinnaalersimanera. Ingammik raajaqarfinni pisarisartakkat ikiliartorsimanerarlugit.
Ippassaq Narsami innuttaasut oqariartuutaasa ilagaat , narsami fabrikki matunagu Royal Greenland –ip nammineq kilisaataasa ilaat Narsamut tunisiartortarsinnaannginnersut. Tassunga atatillugu Henrik Leth oqarpoq.
Namminneq kilisaataatimik pisaat sinerissami fabrikkinut allanut tulaanneqartartut, taakkulu pisaat Narsamut tulaanneqariartortalissagaluarpat, ajornartorsimmik qaangiinaviarnatik, taamaallaalli ajornartorsiummik allamut nuussinnaartussaallutik
Qanormi misigisimavit tusarakku Narsami kilisataatilik radioaviisikkut oqarmat, namminneq kilisaatertik arfineq marlunnik inuttalik taakkulu ilaqutaqarmata piginneqataasut ilanngullutik inuit 20 –t missaat eqqorneqartussaanerat tusarakku.
Henrik Leth akivoq, soorunami tusakkat nuanninngilluinnartut kisiannili raajarniat allamut niusiartornerminni aningaasartuutiminnik tapiiffigitinnermikkut ajunaarutissaagaluinik neqeroorfigineqarsimasut.
Henrik Leth aamma oqarpoq, Namminersornerullutik Oqartussat suleqatigalugit Narsami tunisassiorfimmi sulisut pikkorissarneqarnissaat isumaginiaritsik aammalu aalisakkat allat tulaassorneqartut annerusumik isumagineqalerumaarnerarlugit.
