Narsami A-21 katersugaasivillu allamiut soqutigaat
Narsap kommuniata kulturimut avatangiisinullu illuutaa A-21 aamma Narsap katersugaasiviata illukunik nutarterisarnera nunani allani soqutigineqalersimavoq. Ima soqutigineqartigaaq suliniutit oqaluttuarineqassallutik Tuluit Nunaanni Lancaster Universiteti upernaamut oqalugiartitseqattaalerpat, sammillugu “sumiiffinni isumassarsiullaqqissuseq aamma sumiiffinni ineriartortitsinermi nutaaliorsinnaaneq”.
Narsami katersugaasiviup pisortaa Rie Oldenburg suliniutit pillugit oqalugiariartoqqusaasimavoq.
Seminareqarnermi marluk immikkut samminiarneqarput: Siullermik, pisarneq malillugu periaatsit akimorlugit suleqatigiinnikkut nutaamik ilisimasaqalerneq qanoq anguneqarsinnaanersoq. Aappaatullu illoqarfinni katersugaasiviit ineriartornermut qitiusutut qanoq atorneqarsinnaaneri.
Siunertaavoq takutissallugu periaatsit akimorlugit pisarnerlu malinnagu itsaq pisimasut massakkullu pisartut qanoq ataqatigiissinneqarsinnaanersut aamma inuussutissarsiornerup katersugaasiveqarnerullu akornanni qanoq oqaloqatigiittoqarsinnaanersoq.
Narsap kommuniata A-21-mik suliniuteqarnera soqutigineqalerpoq taamatullu eqqarsartarnermut assuutitut isigineqalerluni. Taamaattumik seminareqarnermi illup kulturimik avatangiisinillu ingerlatsiviusup sammineqarnissaa kissaatigineqarpoq, taannami inooqatigiinnikkut, kulturikkut avatangiisinillu atorluaanermik suliniuteqarfiummat. Aammattaaq katersugaasiviup takornariaqarnermillu suliaqartut suleqatigiinnerisigut takusassanik ineriartortitsineq assersuutigineqarpoq.
Narsamiit nutarterineq avammullu pitsaanerusumik paasissutissiisalerneq oqaluttuarineqassapput. Narsami nunaateqarfiusimasup illukut Qassiarsummilu illut sanaqqinneqartut eskimuullu Thulekulturimeersut pillugit taamatut ineriartortitsinissamik pilersaarutit oqaluttuarineqassallutik.
Seminareqarnermi oqalugiartussat nunanit ukunannga aggersuupput: Kina, USA, Italia aamma Sverige.
