Narsaarsummi plutonium-imik suli mingutsitsisoqarpoq

Ilisimatusarfiup Risø-p Thule-mi timmisartorsuup nakkarnerata kingorna misissueqqereerluni plutonium-imik mingutsitsisoqarneranik misissuisoqaqqittoqarnissaa piumasaraa.

Aamma kalaallinik qallunaanillu immikkut ilisimasalinnik suleqatigiissitaliortoqartussanngorpoq.

Amerikamiut timmisartuutaat ukiut 38-it matuma siornagut Thule-mi, qaartartunik sisamanik useqarluni nakkarfia, suli plutonium-imik mingutsinneqartoq, ilisimatusarfimmi Risø-mit nalunaarusiap nutaap takutippaa.

Nalunaarusiami piumasarineqarpoq Narsaarsummi misissuisoqaqqittoqarnissaa. Timmisartoq nakkarmat anorip sammivia peqqutaalluni Narsaarsuk mingutsinneqarnerusimavoq, nakkartoqaqqammersorlu saliisoqaraluartoq, qinngornernik ulorianartunik peqartuarsimavoq.

-Peqqinnissaqarfimmut maannakkut pingaaruteqartoq tassaavoq, assortorneqarsinnaanngimmat inunnut tappavaniittunut ulorianaateqarsinnaasumik plutonium-imik mingutsitsisoqartoq. Nunallu misissuiffigineqarnissaa pingaaruteqarpoq, Peqqinnissamut pisortaqarfimmi pisortaq Søren Rendal oqarpoq.

Taassuma juunip arfineq-aappaani Danmarkimi Peqqinnissamut ministeriaqarfik ataatsimeeqatigissavaa, qanoq ingerlariaqqittoqassanersoq eqqartorneqassalluni. Ilaatigut nunatsinniit Danmarkimiillu inuttaqartunik suleqatigiissitaliortoqassaaq.

Søren Rendal-ip oqaatigaa aasap ingerlanerani Narsaarsummi nunami silaannarmilu plutonium-imik mingutsitsineq qanoq annertutiginersoq misissorneqassasoq.

-Timmisartorsuarli nakkarmat immami misissuinerit annertuut ingerlanneqarsimapput, taamaammallu imaq immamilu uumasut annertuumik ilisimasaqarfigineqarput. Misissuinerit massakkut ingerlanneqartussat nunami silaannarmilu pissapput, Søren Rendal oqarpoq.

Peqqinnissamut ministeriaqarfimmi allaffimmi pisortap, Bjarke Thorsteinsson-ip oqaatigaa Peqqinnissamut ministeriaqarfimmit misissuinissanut nutaanut koruunit 2,5-3 millionillu akornanni atugassanik immikkoortitsisoqareersimasoq.

Pinngortitaleriffik Risø-milu ilisimatusarfik suleqatigiillutik paasissutissanik katersuillutik nalunaarusiaq Risø-meersoq suliarivaat.