Narsaarsummi mingutsitsineq misissuivigineqassaaq

Thulemi timmisartorsuup nakkarnerata kingunerisaanik qinngornernik navianartunik mingutsitsineq qaammatip ataatsip missaa qaangiuppat misissuivigineqalissasoq, peqqinnissamik pisortaqarfiup pisortaa, Søren Rendal, oqarpoq.

Danmarkip peqqinnissamut ministeria, Lars Løkke Rasmussen, Søren Rendalip ataatsimeeqatigeqqammerpaa.

Timmisartorsuup ukiut 38-t matuma siorna nakkarfiata, Narsaarsuup, silaannaa qinngornernik navianartunik akoqarnernersoq siullermik misissorneqassaaq.

Kalaallit Nunaatali Danmarkillu akornanni isumaqatigiinngissuteqartoqarpoq. Nunap immallu mingutsinneqarsimaneranik misissuisoqarnissaannik piumasaqaatip, aamma silaannaap qinngornernik navianartunik akoqarneranik misissuinissat saniasigut, inuit taamanikkut timmisartup nakkarfiata ukiuni arlalinni qanittuaniissimasut peqqissusaasa misissuivigineqarnissaat Kalaallit Nunaanniit aamma piumasarineqarpoq.

Naalakkersuisut siulittaasuat, Hans Enoksen, aamma danskit ministeriunerat, Anders Fogh Rasmussen, naalagaaffeqatigiinneq pillugu qaammatip uuma ingerlanerani ataatsimeeqatigeereerpata illuatungeriit isumaqatigiissuteqarsinnaanersut paasinarsissaaq.