Narsaarsuk sukumiisumik misissorneqartariaqarpoq
Danmarkimi oqartussaasut massakkut nalilersortussanngorpaat Risømi ilsimatusarfiup Avanersuarmi plutoniummip qinngornerinik ulorianartunik mingutsisisimaneq pillugu nalunaarusiaa. Pinngoqqaatip grundsstoffip plutoniummip qinngornerinik ulorianartunik Avanersuarmi Narsaarsuup nunaani mingutsitsisoqarsimanera nalunaarusiami uppernarsarneqarpoq.
Risømi ilisimatusarfiup siorna misissuisitsinermigut paasivaa, Avanerusarmi 1968-mi amerikamiut timmisartorsuata qaartartorsuutip nakkarneratigut qinngornernik ulorianartunik mingutsitsisoqarsimasoq.
Risømi ilisimatusarfiup misissuinermini Avanersuarmi timmisartorsuup nakkarfiata timaaniittoq nuna Narsaarsuk misissuiffigisimavaa. Misissuinermi nuna arfineq pingasoriarluni tigusiffigineqarpoq paasineqarporlu pinngoqqaammik plutoniummimik akoqartoq.
- Nunap tigusiffigisatta plutoniummimik akoqarnissaa ilimagereersimavarput, avataami imaq taama mingutsineqarsimasoq nallunngilareeratsigu, Risømi ilisimatusarfiup pisortaa Jørgen Kjelms oqarpoq, erseqqissarlugulu massakkut inernerusunik oqartussat naliliinissaat tullinnguuttoq.
Oqaatigineqarpoq nuna plutoniummimik annertoorsuarmik akoqanngitsoq, taamaattorli erseqqissaaatigineqarpoq nunap taama mingutsinneqarsimanera inunnut Narsaarsummi angalasartunut sunniuteqarsinnaasoq.
Tamanna pillugu Narsaarsuup nunaata sukumiisumik misissorneqarnissaanik, kiisalu inuit Narsaarsummiittartut quuinik misissuisoqarnissaanik Risømi ilisimatusarfik inassuteqarpoq.
