Narrunarsagaajumanani toqutsineq

Toqutsisoq arnap sakiatsiarivaa angut, toqutsisuuninilu nassuerutigaa, oqarluni, naalakkiutini arnap malinngimmagit ”narrunarsagaajumanani toqussimagini”.

Angut toqutsisoq, arnallu sakikkuisa ilaqutai allat pingasut, Pakistanimi maanna parnaarussaapput, Pakistanimi politiit nalunaarusiaanni, aviisip Berlingske Tidende-p pigisaani, tamanna erserpoq. Arnap toqutaasup angutaa nalunaarusiaq naapertorlugu nassuiaavoq, panni sakikkumini nunaannarmi illoqarfimmi Kharianimi ukiuni pingasuni kingullerni najugaqarsimasoq. Ukuartik meerartaaqqissinnaanngimmat kusanaatsorujussuarmik pisarsimavaat. Pillaatitut toqutsineq pilersaarusiorneqarsimavoq, arnap uia Danmarkimi najugaqartoq, toqutsinerullu nalaani Danmarkimiittoq, isumaqatigiissuteqarfigineqarsimalluni, toqutaasup angutaa nassuiaavoq.

Angut toqutsisoq sapaatip akunnerani kingullermi tigusaasoq, ullunilu pingasuni tigummigallarneqaraluartoq, Københavnimi Politeeqarfimmi pisortap tullersortaata, Ove Dahl-ip, uppernarsarpaa, iperagaatittariaqarsimavaalli Pakistanimi oqartussaasunit paasissutissanik tigusaqarsimannginnertik pissutigalugu, Berlingske Tidende taama paasisaqarpoq.

Naalakkersuisut oqartussaasullu akuliunnissaat Danmarkimi partiit arlallit Muslimillu Ataatsimiittartoqatigiivisa maanna piumasarilerpaat.