Naqqiut: Ukiut tallimat qaangiuppata tapiissutaarunnissaa siusigineqarpoq

Naalagaaffiup ataatsimoortumik Nunatsinnut tapiissutigisartagai, ukiut tallimat qaangiuppata immaqa oqaluttuaannanngorsimassapput. Aviisimi Politikenimi ullumi taama qulequtsiisoqarpoq, tamannalu ullaaq radioaviisimi issuarparput.
Allattoq Elisa Isaksen
januaarip 11-at 2010 17:03

Kisianni Aatsitassanut Ikummatissanullu Pisortaqarfiup pisortaata Jørn Skov Nielsenip, tusagassiuutinut nalunaaruteqarluni erseqqissarpaa, ataatsimoortumik aningaasaliissutaasartut, ukiut tallimat qaangiunnerini unitsinneqarsinnaanerinik oqaaseqannginnami.

- Uuliasiorneq ukiuni arlalinni ingerlanneqareerpat, akileraarutitigut akitsuusiisarnikkullu uuliasiornermit aatsaat isaatitsisoqarsinnaalissaaq. Tassami uuliasiorniarluni aallarnisaanermi aningaasartuutit immaqa 40 milliardit koruuninik amerlassuseqartut, akileraarutinit akitsuutinillu isaatitsilinnginnermi matussuserneqaqqaartariaqarmata, Jørn Skov Nielsen tusagassiuutinut nalunaarummini allappoq.

Politikenimi allaaserisami Jørn Skov Nielsen issuarneqarpoq, Cairn Energy misileraalluni qillerinermini uuliamik nassaassagaluarpat, ukiut tallimat qaangiuppata uuliasiorluni qillerisoqarsinnaalissasoq.

- Soorlu allaatigisami erseqqissaatigisattut, siunissami uuliasiulerumaarnissap aallartinnissaa suut tamarmik iluatseqqissaarnissaannit kingusinnerunissaa ilimagaarput, Jørn Skov Nielsen naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq