Naqqiut: Inatsisartunut ilaasortat marluk politiinut suli tunniunneqanngillat

Nittartakkami uani inatsisartunut ilaasortat marluk peqquserlullutik taasissussisarsimanerminnik nassueruteqartut, politiinut tunniunneqarsimanerarneqarput. Tamannali eqqortuunngilaq. Inatsisilerinikkut naliliisoqarnissaa Inatsisartut siulittaasoqarfiata aalajangiuppaa, tamatumalu kingorna politimestereqarfiup suliamut akuliutsinneqarnissaa pissutissaqarnersoq isummerfigineqassaaq.
Allattoq Mads Lynge
novembarip 21-at 2008 17:51

Inatsisartunut ilaasortat marluk Inatsisartut ataatsimiittarfianni taasinerni peqquserluttuliortarsimanerminnik ippassaq nassueruteqareersullu Inatsisartut siulittaasuata, Ruth Heilmannip maanna nalunaarutigaa suliamut tunngatillugu inatsisilerinikkut naliliivigineqassasut.

Inatsisartunut ilaasortat marluk Inuit Ataqatigiinneersoq Esmar Bergstrøm aamma Demokraatineersoq Palle Christiansen ippassaq saqqummerput nassuerutigalugulu Inatsisartut taasisarneranni maleruagassanik unioqqutitsillutik ilaasortaqatiminnik ataatsimiittarfimmiinngitsunik taasissussisarsimallutik.

Inatsisartut siulittaasoqarfiata matumani pinerluttulerinermut inatsimmik unioqqutitsisoqarsimanersoq naliliiffigitikkusuppaat. Tamatuma kingornagut Politimesteri suliamut akuliutsinneqarnissaanut tunngavissaqarnersoq siulittaasoqarfiup aalajangiiffigissavaa.

Ruth Heilmannip erseqqissarpaa, Inatsisartut suleriaasiat pisuni taamaattuni iliuuseqarnissamut periarfissiinngimmat. Taamaattumik tamanna iluarsiiviginiarlugu taasinernut atatillugu nakkutilliinermut malitassanik atuutilersitsinissaq siunertaralugu siulittaasoqarfik allannguutissatut siunnersuummik saqqummiussaqarniarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq