Naqqiut

Nioqqutissanik akilersugassanngorlugit pisinermi, akilersuilluni kinguaattooraanni kingunerluutigisinnaasai pillugit ippassaq ullaakkut radioavisimi ilanngutassiaqarpugut.

Tamanna tunngavigalugu pisiniartartut arlallit Nuummi Grønlands Radio Centerimut saaffiginnissimapput.

Ilanngutassiami Eva Rosing ima oqartoq issuarparput:

“qarasaasiaq angallattagaq 6.939 koruuneqarami, akiitsunullu aningaasartuutit 8.181 koruuniusut ilannguteriaramik, taava qarasaasiaq katillugit 15.120 koruuneqalerpoq”.

Taamatulli oqarneq ilumuunngitsoq paasinarsivoq. Grønlands Radio Center nalunaarpoq, erniat pillugit eqqunngitsumik paasissutissiisoqartoq.

- Akilersuisoq pineqartoq akiliiffissaraluaminik aqqanileriarluni kinguaattooruteqarsimavoq, taamaattumillu aningaaserivimmit sullissisorisatsinnit akilersuinerata allanngortinneqarnissaa siunnersuutigineqarluni allanngortinneqarpoq – taamaalilluni qaammammut akiliutigisartagai appartingaatsiarneqarlutik. Tamatuma kinguneranik akilersuisoq isumaqatigiissutaareersuniit sivisunerusumik akilersuisussanngorluni.

Akilersuilluni pisisup akilersuinini eqqortissimasuuguniuk 17-eriarluni akiliiguni akilersukkani naammassisussaagaluarpaa, taamalu pisiami akiata saniatigut aningaasartuutai 2.000 koruunit ataallugit amerlassuseqassagaluarlutik.