Naqitani sulisut sisamat soraarsitaapput
- Aviisit ajornartorsiornerisa kinguneranik ilaatigut quppernerit ikinnerit naqittalersussaavavut, taamaalillutalu aappaagumiit taakkunatigut isertitakinnerulissalluta. Taamaattumik sulisut sisamat soraarsittariaqarsimavavut, Naqitani pisortaq Peter Frederiksen Atuagagdliutit nittartagaannut oqarpoq.
Sermitsiami sulisut pingasut tallimanngormat soraarsinneqareerput, taakkulu saniatigut aviisiliortutut atorfiit marluk inuttalerneqaqqinngitsuussallutik.
Atuagagdliutini sulisut pingasut septembarimi suliunnaarput, sisamanngormallu aamma pingasut suliunnaarlutik.
Aviisini akisussaallutik aaqqissuisut oqaatigaat, soraarsitsinerpassuarnut ilaatigut takoqqusaarutitigut isertitat ikiliartornerat patsisaasoq - ilaatigut Namminersorlutik Oqartussat kommunillu ilaat amerligaluttuinnartunik nunani allani aviisini takoqqusaaruteqartalermata. Ukiut nikinnerannit nassiussuinermut akiliutinut tapiissutit peerneqartussaanerat aviisit aningaasarsiornerannut aamma eqquinerluttussaavoq.
Naqiterivimmi Naqitani takoqqusaarutitigut isertittakkat allanngoriarsimanerat malugineqarsinnaalluarpoq.
- Takoqqusaarutit ilusilersornerinut, ukiut marluk matuma siornagut, ukiumut 4 millionit koruunit kaaviiaartittarpavut. Maannakkut kaaviaartittakkavut 700.000 koruuninut apparsimapput, Peter Frederiksen oqarpoq.