Naqinnernik ilisarinnissinnaanngitsut Narsami atuarfiliuunniarneqarput

februaarip 08-at 2006 14:29

Naqinnernik ilisarinnissinnaanngitsunut nunatsinni atuarfik Narsami inissisimasoq timitalerneqarluarsinnaavoq. Tamanna pillugu Narsap Kommuniani Aningaasaqarnermut Ataatsimiititaliap Kultureqarnermut Ilinniartitaanermullu Naalakkersuisoq Doris Jakobsen Nuummi oqaloqatigeqqammerpaat.

Ukioq manna piviusunngorsinnaanngilaq aammalu aappaagu neriorsuutigisinnaanagu Kultureqarnermut Ilinniartitaanermullu Naalakkersuisoq Doris Jakobsen ilisimatitsisimavoq. Kisianni takorluukkap piviusunngorsinnaanera Narsap borgmesteriata Kiista P. Isaksen–ip upperaa.

-Suli isumalluarpugut atuarfiup aningaasanik tapiiffigineqarnissaa Naalakkersuisunut qinnuteqatigaarput, kisianni atuartut ilinniagaqarsersiuteqartussaammata aamma tapiissutaasussat qanoq amerlatiginissaat oqaatigiuminaappoq, borgmester Kiista P. Isaksen oqarpoq. Siorna decemberimi misiliilluni naqinnernik takunnissinnaanngitsunut qaammat ataaseq Narsami atuartitsinissamut qinnuteqarsimasut 22-upput. Taakkulu saniatigut sinerissamit siarnguttoqarpoq soqutiginnikkaluartunik, taamaattumik pisariaqartitsisoqarnera ilisimaneqarpoq.

Decembermi 2005-mimi naqinnernik takunnissinnaanngitsut Narsami qaammat ataaseq atuartinneqarmata peqataasunit 16-nit, qulit tamakkiisumik ingerlaqataasimapput taakkunanngalu 6-nillit ingerlaqqissinnaagaluartutut nalilerneqarsimammagaluarput.