Naqinnernik ilisarinnissinnaanngitsut ikioqquai

Nunatsinni naqinnernik ilisarinnissinnaanngitsut ikiorserneqartarnerat pillugu Anda Uldumip Naalakkersuisut itisileeqqullugit apereqqippai.
Allattoq Oline I. Olsen
februaarip 15-at 2011 15:28

Anda Uldum (D) isumaqarpoq innuttaasut naqinnernik ilisarinnissinnaanngitsut ilinniaqqinnissamut ikiorserneqartarnerannut tunngasut tigussaanngippallaartut, tamannalu tunngavigalugu Naalakkersuisunut paragraf 37 naapertorlugu apeqquteqaqqippoq.

Apeqquteqarnermini meeqqat inuusuttullu meeqqat atuarfiini atuarniarnermikkut allanniarnermikkullu sanngiitsut ikiorserniarlugit suliniutit qanoq ittuuneri pillugit Naalakkersuisut itisileeqqullugit qinnuigai.

- Tassa naalakkersuisumut apeqquteqaqqinninnut tunngaviit ilagaat, akissutai ersarippallaanngitsutut imaluunniit tigussaavallaanngitsutut isigigakkit, taamaammat paasisaqarluarusullunga apeqquteqaqqippunga, Demokraatit sinnerlugit inatsisartuni ilaasortaq Anda Uldum apeqquteqaqqittariaqarnerminik tunngavilersuivoq.

Naqinnernik ilisarinnissinnaanngitsut atuartitaanerminni ikiorserneqartarnerat pillugu paasisani naammanngimmata Naalakkersuisunut paragraf 37 naapertorlugu apeqquteqaqqittariaqarsimavoq.

Atuarniarnermikkut allanniarnermikkullu sanngiitsut atuarfinni assigiinngitsunik sunik suliniuteqarfigineqarnerannut Naalakkersuisut nalilersuissasut Anda Uldumip qinnuiginninnerminut ilannguppaa. Suliniutit aamma assigiissarneqassanersut apeqquteqaatigaa.

Anda Uldumip naqinnernik ilisarinnissinnaanngitsut amerlassusii eqqoriarsinnaanngilai, tassami atuartut allanniarnermikkut atuarniarnermikkullu sanngiitsut naqinnernik ilisarinnissinnaanngitsuusutut suli misilinneqartanngimmata. Misiliisalernissarlu Naalakkersuisunit pilersaarutigineqarnersoq ilanngullugu apeqquteqaatigaa.

- Qallunaatut ”ordblindtest”-imik taaneqartartoq nunatsinni atuutinngilaq. Taamaasilluta paasisinnaanngilagut una ”ordblind”-it imaluunniit atuarniarnermikkut allanniarnermikkullu ajornartorsiutillit. Siusissukkut paasineqartarnissaat pingaarutut isigaara, Anda Uldum oqarpoq.

Ukioq 2020-mi innuttaasut pingasuugaangata marluk ilinniagaqarsimasuunissaat Naalakkersuisut anguniarpaat, tamannalu piviusunngortinneqassappat naqinnernik ilisarinnissinnaanngitsut siusissukkut ikiorserneqartalernissaat Anda Uldumip pingaartuusoraa.

- Taanna anguniassagutsigu inuit tamarmik periarfissinneqartariaqarput ilinniarnissaminnut. Nalunngilarput naqinnernik ilisarinnissinnaanngitsut aalajangersimasumik ikiorserneqarnerisigut ingerlariarteqqinneqarsinnaasut, Anda Uldum oqarpoq.