Naqinnernik ilisarinnissinnaanngitsunut suliniut aallartippoq
Taassumami paaserusummagu, innuttaasut atuarniarnermik allanniarnermillu ajornartorsiuteqartut ikiorserneqarsinnaanissaannik Inatsisartut isumaqatigiillutik aalajangiussaat qanoq malitsinniarneqarnersoq.
Palle Christiansenip erseqqissarpaa, suliassaq aallartisarneqareermat, aamma Ilinniartitaanermut Naalakkersuisoqarfik qaammat maannamiilli suliffeqarfik Epinion suleqatigalugu inuit immikkut pisariaqartitsisut pillugit ilisimasatta qulaajarnissaat aallartissavaa, taakkununnga ilanngullugit innarluutillit aamma atuarniarnermik allannermillu ajornartorsiuteqartut.
Tamatumunnga peqatigitillugu Nunat Avannarliit Ministeriisa Siunnersuisoqatigiivisa inersimasut atuarniarnermik allanniarnermillu pisinnaasaat pillugit ataatsimeersuartitsinerisa malitsigisaanik, Naalakkersuisoqarfiup atuarniarnermikkut allanniarnermikkullu sanngiitsut pillugit iliuusissatut pilersaarut suliaraa. Suliniutit tamarmik Naalakkersuisut meeqqanut, inuususuttunut ilinniartitsinikkullu periusissiaasa piviusunngortinniarnerinut ilaatinneqassapput.
Inatsisartuni ilaasortat suliap qanoq ingerlaneranik periarfissaq qaninnerpaaq atorlugu ilisimatinneqarumaartut Palle Christiansenip Andreas Uldumimut akissummini neriorsuutigaa.