Napãtôk' pillugu suliaq aqagu naammassineqassaaq
Naalakkersuisunut ilaasortaasimasoq, Jens Napãtôk’, naalakkersuisuunermi nalaani ilassinninnermut aningaasaliissutinik atuipilussimasutut unnerluutigineqartoq, aqagu tallimanngornermi ullaap tungaani qulingiluanut qiteqquppat eqqartuunneqassaaq. Eqqartuussisuuneq Søren Søndergård Hansen Sermitsiamut taama ilisimatitsivoq.
Allattoq Mads Lynge
decembarip 20-at 2007 07:46
Eqqartuussutip nalunaarutigineqarnissaa decembarip pingajuanni pisussaagaluartoq aqagumut kinguartinneqarpoq, eqqartuussisuuneq uppernarsaatinut misissueqqissaarnissamut piffissaqarusummat.
Unnerluussisup, politimesterip tulliata Morten Nielsenip, qaammatini sisamani pinerluuteqarsimasunut inissiisarfimmiittussanngortitsinermik pineqaatissiisoqarnissaa piumasaraa.
Eqqartuussutip nalunaarutigineqarnerani Jens Napãtôk’ najuuttussaanngitsoq, oqarasuaatikkulli malinnaatinneqassasoq Sermitsiamit ilisimatitsissutigineqarpoq.
Eqqartuussutip nalunaarutigineqarnera, aqagu pisussaq Radioaviisimit malinnaaffigissavarput.
