Napãtôk'-p allatsigisimasaa killisiorneqartoq

Akiligassat soorliit aningaasivimminiit sorliillu nunatta karsiata akiligassarinerai takujuminaatsinneqartoq, Jens Napãtôk’-p naalakkersuisuunerani allattaata Ulrik Josefsenip suliamik ilisimannittutut Nunatta Eqqartuussiviani ullumi nassuiaanerani tamanna erserpoq.

- Uanga naalakkersuisumut allatsitut, akiligassat suut naalakkersuisup nammineq inuttut akilissanerai nakkutigissallugit suliassarinngilara. Uanga suliassaraara ilasseqatiginnittoqarsimatillugu, suna pillugu kikkullu peqataasimanersut nalunaarsornissaat, Jens Napãtôk’-p naalakkersuisuunerani piffissami sivisunerpaami allattorisimasaa Ulrik Josefsen oqarpoq.

Taama oqarneq, Napãtôk’-p illersuisuata eqqartuussissuserisup Phillip Comerfordip apeqqutaanut akissutaavoq, Comerfordip apeqqutigimmagu, ilassinninnermut aningaasat atugassiat eqqortumik atorneqarsimanersut nalilersinnaaneraa.

Napãtôk’-p ilassinnissutinik atornerluisimasutut unnerluutigineqarnerata Nunatta Eqqartuussiviani suliarineqarnerata ulluni makkunani ingerlanneqartup ullumi ulluisa aappassaanni Ulrik Josefsen killisiorneqartunut ilaavoq.

Taamalli ajornanngitsigisumik nassuiaassanngitsoq unnerluussisoq politimesterip tullersortaa Morten Nielsen isumaqarpoq.

Neriniartarfimmi nerrittarsimanerit, imigassanik pisisarsimanerit allarpassuillu Namminersornerullutik Oqartussanit akilerneqarsimasut tulleriiaarlugit saqqummiussorpai, inuup nammineq akiligassaatut isigineqartut.

- Taakku pillugit oqaaseqaqqissinnaanngilanga, Ulrik Josefsen taakkartuisoqalermat oqariataarpoq.

- Oqaaseqartussaanngilatimmi. Killisiorneqaravit suliamik ilisimannittutut apeqqutit akiuinnartussaavatit, Nunatta Eqqartuussisua Søren Søndergård Hansen nassuiaavoq.

Ulrik Josefsenilumi taamaaliorpoq.

Københavnimi imerniartarfimmi Royal Barimi Napãtôk’, allattaa, angullu Napãtôk’-p Illoqqortoormiuni nunaqqataa imigassarsisimapput kingornalu aamma Mongolian Barbeque-mi nerrissimallutik. Nunatsinni akileraartartut taakkununnga 1.500 koruuneerput.

Ulrik Josefsenip eqqaamasai naapertorlugit, Københavnimi imerniartarfimmi neriniartarfimmilu aningaasartuutaasut ilassinnissutitut isigisariaqarput, Kalaallit Nunaata iluani angallannikkut pissutsit, pingaartumillu Illoqqortoormiut mittarfiani ajornartorsiutit taamani eqqartorneqarmata. Nassatanik annaasaqarneq peqataasut aamma ilisimasaqarfigimmassuk.

Nunatta Eqqartuussisuata suna pineqarnersoq paasilluanngikkaluaraa, allattaasimasup pineqartumi ilassinninneq naalakkersuisup suliaanut attuumassuteqarsimasutut nalilerpaa.

Namminersornerullutik Oqartussat eqqartuussivimmut Jens Napãtôk’-mut tunngatillugu marlunnik suliassanngortitsinikuupput. Siullermi aallartereersumi nunatta karsianit pinerluttulerinermut inatsimmik unioqqutitsisoqarsimanersoq naliliiffigineqassaaq. Ilimanarporlu unnerluussisoq illersuisorlu sisamanngorpat saqqummeereerpata pineqaatissiisoqassasoq. Unnerluussisup piumasariniarpaa Jens Napãtôk’ pisuutinneqaruni qaammatini sisamani pinerluuteqarsimasunut inissiisarfimmiitinneqassasoq.

Suliassat aappaanni Jens Napãtôk’ Namminersornerullutik Oqartussanut taarsiissanersoq naliliiffigineqassaaq.