Napãtôk': - Akisussaaffigaara

Jens Napãtôk’ pisunut 76-inut tunngasunut ippassaq killisiorneqarpoq. Killisiorneqarnerani pineqarnerupput, viinninik, immiaaqqanik imigassanillu Jens Napãtôk'-p angerlarsimaffimmini piareersimassuutitassamisut pisiniartarneri. Kalaallit Nunaanni avataanilu neriniartarfiliartarneri, tamatigut Charoen Porn-imi tusaamanerluutigilikkaminilu Københavnimi imerniartarfimmi Wonder Bar-imi.

Unnerluussisup Morten Nielsen-ip Jens Napãtôk’ killisioramiuk paasiniaaffigaa akiliinerit uppernarsaaterpassuini, siunertat peqataasullu imerniartarfinnut neriniartarfinnullu ilaatigut nalunaarutigsisarsimanngikkai.

- Akiuminaatsippara, kisianni atsiortarnikuuakka Jens Napãtôk' oqarpoq, Charoen Porn-imi neriartornermut ataatsimut 1563 koruunimik akilerneqartumut, peqataasunik siunertamillu nalunaarsorneqanngitsumut. Akilerneqartut ilagaat kukkukuuaraq pomfrit-italik, nalinginnaasumik meeqqanut nerisassatut neriniartarfimmi sassaalliutigineqartartoq. Nassuiaasinnaannginneq ilassinnissimanerni killisiuinermi uteqattaartuarneqarpoq.

Taamaakkaluartorli Namminersornerullutik Oqartussat naatsorsuuseriviatigut apeqquserneqarnatik ingerlaannartarput, naak kaajallaasitami 1993-imeersumi peqataasut kikkuunerannik siunertamillu piumasaqaateqartoqarnera allaqqagaluartoq.

- Naalakkersuisutut tamanna naggaterpiaatigut akisussaaffigaara, qimarratiginianngilaralu Jens Napãtôk’ oqarpoq, nassuiaanermini oqarpoq nereqatigiinnerit peqataasunik siunertanillu allattuiffiusimanngikkaluarlutik ilassinninnerusut. Ilassinninnermut malittarisassat assigiinngitsorpassuartigut nassuiarneqarsinnaapput Jens Napãtôk’ oqarpoq.