Napuuliuup nujai kipinikut Australiami nassaarineqarput

Napoleon Bonapartep nujai, qularnanngitsumik toqummat kipineqarsimasut, Australiami illoqarfiit ilaanni Sydneymi nassaarineqarput.
Allattoq Elisa Isaksen
marsip 04-at 2010 04:41

Illoqarfimmi tassani kommunalbestyrelsip ataatsimiittarfiata ukiunik 130-nik pisoqaassusillip tamakkiisumik nutarterneqarneranut atatillugu nutsat nassaarineqarput.

Frankrigimi sakkutuut naalagaat taanna 1821-mi 51-inik ukioqarluni toquvoq. Inuunermini ullut kingulliit qeqertami St. Helenami, Sydneymit 13.000 kilometerinik ungasissusilimmiittumi atorpai. Taamalilluni nujai qanoq ilillutik Australiamut pisimanersut paasiuminaatsunut ilaavoq.

Taamaattorli nutsanut nassaarineqartunut ilanngullugit allakkat aamma nassaarineqarput.

Allakkani Skotlandimiu Ned Todd-imik atilik nassuiaavoq, nutsat arnamit pissarsiarisimallugit. Arnap taassuma qatanngutaa, sakkutuut naalagaaraat William Crockat, Napuuliup toqunerani najuussimavoq.

- Kukkunngikkuma, arnap taassuma oqaatigaa qatanngummi (sakkutuut naalagaaraata Crockat-ip) toqusup tusaamasap nujai nammineerluni kipisimagai, allakkani allassimavoq.

Sydneymi kommunip allaffiata nutarterneqarneranut isumaginnittoq Margaret Betteridge allakkat taakku sumiginnagassaanngitsutut isigai.

- Nutsat qanoq ilillutik tamaanga pisimanersut naluarput. Kisianni peqquserlulluni allanngortitaarpasinngillat, taanna taama naggasiivoq.