Napparsimmavissuarmi kalaallisut aliikkusersoqatigiipput

Ullumikkut meeqqat qulit missaanniittut angajoqqaatik peqatigalugit napparsimmavissuup paarlersuaniipput, ilaatigut qajaaraliorlutik, sapangaaqqerillutik aamma Nunatsinni nunaqarfiit ilaanik millisitamik ilusilersuillutik.

Sapaatip akunnerata ingerlanerani erinarsortartoq Aviaaja Lumholt erinarsussaaq, qilaatersortartoq Jens Davidsen qilaatersussalluni aamma erinarsoqatigiit Aavaat erinarsussapput. Tamakku saniatigut  issittumi ilisimasassarsiortartoq Peter Freuchen aamma umiarsuaq umiusoq Hans Hedtoft pillugit oqalugiartoqassaaq. Aamma atuakkiortoq Kristian Olsen Aaju oqalugiassaaq. Kalaallit nerisassaataanik marlunngorpat sassaalliisoqassaaq aamma pingasunngorpat kalaallisut naalagiaqatigiittoqassaaq kingornatigullu kaffillertoqarluni. Aamma Julie Berthelsen tupaallatsitsilluni kalaallit meerartaannut uninngasunut pulaarniarpoq.

Sapaatip akunnerani sammisaqartitsineq Rigshospitalip immikkoortortaasa arlallit suleqatigiillutik aaqqissuussaraat, ilaatigut atuarnermik ingerlatsivimmit, Kalaallit Nunaannut immikkoortortamit, oqaluffimmit atuakkanillu atorniartarfimmit.

- Taamaaliorpugut kalaallit uninngasut ilisarisinnaasaminnik sammisaqarniassammata. Tassami maani uninngasuuneq artornarsinnaasarmat, suummi tamarmik taakkununnga takornartaammata. Aammattaarli Kalaallit Nunaat pillugu paasissutissiinerussaaq, kulturilu kusanartoq takutillugu, atuakkanik atorniartarfimmi sulisoq Bodil Sandsø oqarpoq.

Rigshospitali aatsaat siullermeerluni Kalaallit Nunaannik sammisaqalinngilaq, tamatumalu ingerlatiinnarnissaa eqqarsaataasoq taassuma oqaatigaa. Aaqqissuussinerit soqutiginnittunut tamanut ammasuupput. Aamma qallunaat Rigshospitalimi uninngasut taamatut sammisaqartitsinissaq qilanaareqigaat, Kalaallit Nunaannut tunngatillugu ataqatigiissaarisoq, Hanne Abild Meyer oqarpoq.

Rigshospitalimi kingullermik kalaallinut ulloqartitsisoqarmat assit uani takuneqarsinnaapput:

http://www.rigshospitalet.dk/menu/AFDELINGER/Hovedortocentret/Groenlandskoordinationen/Praktisk+info/Arrangementer+og+aktiviteter/