Napparsimmavissuarmi atuarfik nutaaq kalaallit meerartaannut peqqissartunut iluaqutaassasoq

Atuarfeeqqami tassani ilinniartitsisunik tallimanik meeqqanut inuusuttunullu Danmarkimeersunut, Savalimmiuneersunut nunatsinneersunullu atuartitsinissamut piareersimasoqarpoq.

Napparsimmavissuarmi meeqqanut inuusuttunullu uninngasunut atuartitsinerit tamarmik atuarfimmi tassani sananeqaqqammersumi napparsimmaviup inersuani silarlermiittumi ingerlanneqartalissapput. Napparsimmavissuarmi siusinnerusukkut atuartitsinerit inini assigiinngitsuni pingasuni ingerlanneqartaraluarput.

Neqeroorullu nutaaq ilaatigut kalaallit meerartaannut Danmarkimi qaammatini qassiiusuni peqqissarneqartariaqartunut pitsanngorsaataassaaq.

Ilinniartitsisut savalimmiormiut kalaallillu tallimat meeqqanut naalagaaffeqatigiinnit pingasuneersunut ulluinnarni ilinniartitsisassapput.

- Ilinniartitsisut atuartullu atuarfimmut ataatsimut ataatsimoortinnerat assigiinngitsorpassuarnik iluaqutissartaqartoq, atuarfiup aqutsisua, Lone Stisen oqarpoq:

Atuartut ataatsimuulissasut

- Ilinniartitsisut suliaminni ataatsimoorlualissallutillu imminnut atorluarsinnaanerulissapput, siullermimmi eqimattani pingasuni tamarmik immikkut atuartitsiveeraqarlutik inissisimagaluarput, Lone Stisen oqarpoq.

- Meeqqat peqqissartut qatanngutaallu angalaqataasinnaasut ataatsimimoortinneqaratigut meeqqat ukiu, atuagarsornikkut piginnaasaat atuagarsornikkullu suliaat aallaavigalugit immikkoortinneqarsinnaassapput. Meeqqallu ukioqatiminnik, ilinniagassaminnik atuagarsornikkullu unammillikkaminnik assigiikkaangamik naapilluarnerusarput, atuarfiup aqutsisua oqarpoq.

Napparsimmavimmili siniffimmiiginnarluni atuartinneqarsinnaaneq aamma periarfissaaginnassasoq, Lone Stisen oqarpoq.

- Ilinniartitsisut pisarnertut meeqqat atuarfimmukarsinnaanngippata ininukartassapput. Tamanna angajoqqaat, ilinniartitsisut, perorsaasut immikkoortortaqarfimmilu peqqissaasut suleqatigiinneratigut isumaqatigiissutigineqartarpoq.