Napparsimavissuarmi nakorsaanerit aalassassimaartut

- Suliunnaarallartitsineq Peqqinnissaqarfiup ulluinnarni ingerlannneqarneranut ajoqutaaginnarani ikaarsaarialernermut aamma akornutaaqaaq. Ilami ippassaq, ullumilu pisunut aqagulu susoqassanersumik oqaaseqarsinnaasunik pisariaqartitsivugut, Allan Gelvan, Dronning Ingridip Napparsimmavissuani nakorsaanerit sinnerlugit Radioaviisimut taama oqarpoq.

Radioaviisimi paasisavut naapertorlugit peqqinnissaqarfimmi sulisut nuimanerit akissarsiassaasa qaffanneqarnissaanut isumaqatigiissusiaq suli atuutsinneqalersimanngeriarmat siumoortumik akissarsitinneqartariaqarsimapput.

Qullersalli aningaasanik taamatut tunniussisimanerat Peqqinnissamut Naalakkersuisoqarfiup ilisimanngisaanik pisimanissaa nakorsaanerit takorlooruminaatsippaat.

- Taama paasisakitsigisimanerat assorsuaq tupinnarpoq. Tassami peqqinnissaqarfimmut nutarsaaneq naalakkersuisoqarfiup taassumalu qullersaata suliarivaat, tassalu nakorsaaninngortussat peqqissaanerusuusussallu isumaqatigiissutissaata nutaap suli atuutsinneqalinngitsup suliarineqarnera Naalakkersuisoqarfiup isumagisarimmagu akissarsiassanut isumaqatigiissutissat suli inissinneqarsimanngitsut aamma ilisimareersimasariaqaraluarpaat, Allan Gelvan oqarpoq, nakorsaaneqatinilu siumoortumik akissarsitinneqarallarsimasut ilisimanerarlugu.

Taamaammat sunarpiaq pissutaalluni qullersat suliunnaarsinneqarsimanersut nakorsaanerit sinnerlugit oqaatigisinnaannginnerarpaa.

Ann Birkekjær Kjeldsen ullumi attaveqarfiginiaraluaratsigu iluatsinngilarput, tassami misissuineq sumut killinnersoq paaserusukkaluaratsigu, siumoorlunilu akissarsititsigallarnerit peqqinnissaqarfiup ilumut ilisimasaqarfigisimannginnerai aamma paaserusukkaluaratsigu.

Qullersat pingasut suliunnaarsinneqartut suliaat taartaagallartunit maanna suliarineqartarmata manna iluatsillugu oqaatigisinnaavarput.