Napparsimaveqarfiit tunissuteqarfigineqarput

Atortut nutaat pilattaanermi ilisimajunnaartitsissutit, sinerissap ilaanni atorneqalereerput. Radioaviisimiillu Aasiaat napparsimavimmi pisortaq atortumut nutaamut qujamasuttoq oqaloqatigaarput.

- Atortorissaarummik nutaamik peqalernerput nuannaarutigigeqaarput, Aasiaat napparsimaviani pisortaq Jørn Breinholt oqarpoq.

Karen Elise Fond nunatsinni peqqinnissaqarfimmut aningaasanik 2.1 millioni Kroninik tunissuteqarneratigut sinerissami napparsimaveqarfiit pilattaanermi ilisimajunnaartitsissutinik nutaanik pilersorneqarput.

-Peqqinnissamut naalakkerusisoqarfik  Dronninng Ingridillu napparsimavissuani sulisut Karen Elise Fondimut 2009-mi qinnuteqarsimapput. Qinnuteqarnerlu  ilisimajunnaartitsissutinik nutaanik 14-ninik pisinissamik tunngaveqartoq iluatsissimavoq. Dronnng Ingrid napparsimavissuani ilisimajunnaartitsinermi nakorsaaneq Niels Kieler Jensen oqaluttuarpoq.

Atortut 2010 Novemberiugaa piniarneqarsimapput, januarimilu ukioq manna Nuummut tikimmata  misilittaqqaarneqarsimallutik. Maannalu sinerissami napparsimaveqarfinni sumiiffinnut nassiussuunneqareersimalerput.

Nanortalimmi, Qaqortumi, Narsami, Paamiuni, Maniitsumi, Sisimiuni, Uummannami, Upernavimmi, Tasiilami  Aasiannilu ilisimajunnaartitsisutit nutaat atorneqalereerput.

Kiisalu Qaanaami, Qeqertarsuarni, Qasigiannguanilu ilisimajunnaartitsisuutit nutaat tikereersimapput sulili atorneqaleratik.

Sapaatip akunnerani uani ilisimajunnaartitsissut nutaaq Aasianni atorneqalerpoq. Pilattaanernillu suliaqarnermi iluaqutaalluassaaq.

- Nuannaarutigeqaarput atortorissaarummik pisaarnerput, ilisimajunnaartitsinermimi pisariinnerusumik atortoqalerpugut. Ilisimajunnaartitsissummi nutaaq ilaatigut annersaartuutitaqarpoq, taamaalillunilu suliaritsittup sinininnerani anersaartorneranut ikiusinnaalluni,aamma monitoreqarpoq, tassuunalu suliaritsittup qanoq issusaa malinnaaffigisinnaavarput, Aasianni napparsimaviup pisortaa Jørn Breinholt taama oqarpoq.

Dronninng ingrid napparsimavissuani ilisimajunnaartitsisartut sumiiffinni atortunik atuilersiusussani misilittaallutillu sulisunut iliniartitsisarput, Taamatullu ilinniartitsinerat ulluni makkunani Aasianni ingerlanneqarpoq.