Napparsimasut tusaaneqanngitsutut misigisut

Nunatsinni Peqqinnissakkut nakuutilliisoqarfiup ilisimaligaa naapertorlugu, tamanna peqquteqarpoq, peqqinnissaqarfinni sulisut napparsimasullu akornanni attaveqatigiinnerlunnerup kinguneranik.

Peqqinnissaqarfinni sulisut kalaallinut naapparsimasunut oqaloqatigiinniarnikkut ajornartorsiuteqartarput, napparsimasullu ilaasa qanoq innertik iluamik oqaluttuarineq ajornerannik pissuteqarluni.

Kalaallit suliaritinnerminni kingorna maalaarutaat 56-it, Nunatsinni peqqinnissakkut nakkutilliisoqarfiup 2010-mi suliaraat, Kunngeqarfik Danmarki ataatsimut isigissagaanni Nunatsinni maalaarutit amerlanersaallutik.

- Attaveqatigiinnerlunnerup kinguneranik maalaarutit amerlagaatsiarput, tamatumunnga pissutaanerulluni napparsimasut paasineqartannginnertik misigisimasaramikku.

Peqqinnissakkut nakkutilliisoqarfimmi sullissisoq peqqissaasorlu, Turid Bjarnesson Skifte oqarpoq. Taassuma aamma oqaatigaa oqaatsitigut ajornartorsiorneq kisimi peqqutaanngitsoq.

- Peqqutaasut ilagilluinnarpaat, nakorsat peqqissaasullu amerlanertigut qallunaajusarmata imaluunniit nunanit avannarlerneersuusarmata, taamaattumillu paaseqatigiinniarnikkut ajornartorsiuteqartarlutik, tassa kalaallit qanoq paasinnittaasiat sullissisut nalusaramikku. Peqqutaasunullu ilaavoq, kalaallit napparsisut qallunaanut naleqqiullutik tunuarsimaanerusarneri, tassami nakorsap nappaammut naliliinissaa kalaallit tamattigungajak utaqqiinnartaramikku.

Turid Bjarnarsson Skifte oqarpoq nangillunilu.

- Tamatumalu kingunerikkajuppaa kalaallit napparsimmavinnit anisarlutik misigisimallutuik paasineqaratik. Taamaattumik isumaqarpunga oqaatsitsigut paaseqatigiinngittarneq tamassumunnga pissutaanerpaasoq.

Turid Bjarnarsson Skifte isumaqarpoq, napparsimaveqarfiup maanna suliassaasa pingaarnersarissagaa, napparsimasut katsorsaasullu imminnut oqaloqatigiittarnerisa pitsannerulersinneqarnissaa.

- Malaaruterpassuit pinngitsoortinneqarsinnaagaluarput, napparsimasoq nakorsarlu paaseqatigiilluarlutik pisalertuuppata.

Turid Bjarnarsson Skifte isumaqarportaaq, peqqissaasut napparsimasunut paasinninnerusariaqartut kalaallillu napparsimasut alapernaannerusariaqartut qanorlu misigisimanertik toqqaannarnerusumik oqaluttuarisarlugu.

- Napparsimasut oqaatsitsigut paasineqannginnertik pivallaarnagu, nakorsamut toqqaannarnerusumik oqarsinnaalertariaqarput: Kingullermik nakorsiarama susoqarnersoq paasinngilara, nassuiaatilaarsinnaavinga? Taamatut paasiniaarnerup pilersittassavaa maalaarutit sivisuummik ingerlanneqartartut pinngitsoortsissinnaanerannut.

Peqqinnissakkut nakkutilliisoqarfimmi sullissisoq peqqissaasorlu, Turid Bjarnesson Skifte taama oqarpoq.

Nunatsinni napparsimasut maalaarutaasa suliarineqartarneri ukiuni kingullerni sivitsoriartorsimavoq. 2010-mi sivisunerpaalersimalluni, tassa agguaqatigiissillugu suliaq ataaseq qaammatini 16,7-inik sivisutigisalersimalluni. Tamanna Peqqinnissakkut nakkutilliisoqarfiup ukiumoortumik nalunaarutaani allassimavoq.