Napparsimasut peqatigiiffeqalernissaat pilersaarusiorneqartoq

Peqqinnissaqarfimmik atuisut ataasiakkaat, peqatigiiffiillu, ataatsimoorlutik, peqqinnissaqarfimmut saaffiginnissutaat peqatigiiffimmit sullinneqartassapput, peqatigiiffimmik aallartisaaniartoq Astrid Hansen Hard oqarpoq.

Inuit ataasiakkaat peqatigiiffimmut ilaasortanngornermikkut kiffartuuneqarsinnaalissapput. Kisimiikkunik peqqinissaqarfimmut nukittoreeqqisumut illuatungiuliunniarunik peqatgiiiffik aqqutigalugu tusaaniarneqarnerulissapput.

Peqatigiiffiup nittartagaqalernissaa takorloorneqarpoq, paasissutissanillu atuagaaqqanik paasissutissanillu saqqummersitsisalernissaa aamma takorloorneqarluni. Ilinniarluarsimasunik siunnersortinik sulisoqarluni peqatigiiffik ingerlasinnaasoq, peqatigiiffimmik pilersitsiniartup Astrid Hansen Hardip naatsorsuutigaa.

Assigiinngitsunik nappaateqartut innarluuteqartullu Kalaallit Nunaanni peqatigiiffeqarput, taakkualu peqatigiillutik isummersoqatigiittarnissaat, avammullu ataatsimoorlutik, peqqinnissaqarfinnut politikerinullu oqaaseqaasiortarnissaat, taakkunanngaaniillu peqatigiiffiup tusarniarneqartarnissaa, peqatigiiffiliorniartumit takorloorneqarpoq.

Napparsimasut peqatigiiffissaat aallartinniarlugu sapaatip akunnerata tulliani ataatsimiittoqassaaq, Astrid Hansen Hard oqarpoq.