Napparsimasut nakorsiaqqusat
Narsami ulluni kingullerni tallimani inersimasut marluk assigiinnik nappaateqaleriataarlutik aappaata toqunera pissutigalugu Narsap nakorsaanera, Kent Kleinschmidt, narsarmiunut mianersoqqusivoq 38,5 qaangerlugu kissarneqalersimagunik piaartumik nakorsiaqqullugit. Qaratsap ameraasaatigut aseruuttoornerusinnaasut suli iluamik paasineqanngilaq. Kent Kleinschmidt oqarpoq ullut tallimat ingerlanerinnaanni inersimasut marluk napparsimalerujussuarnerat mianersornissamik pisariaqalersitsisoq, pingaartumik napparsimasup aappaata toqunera eqqarsaatigalugu, taamaattumik narsarmiut kissarneqarlutik nerrinatik merianngullutillu napparsimavillutik misigisimagunik piaartumik nakorsiartariaqartut. Qaratsap ameraasaatigut nappaataasinnaanersoq iluamik suli paasineqanngilaq, taamalu tuniluuttuunera suli nalunarluni, kisianni misissuinertigut tigusatik Nuummut nassiussorneqartut paasiniarneqareerpata sorpiaanera aatsaat paasineqarumaartoq. Aamma suli nalunarpoq ukioqqortussutsimut atassuserneqarsinnaanersoq, tassa imaappoq meningitisiuguni nalinginnaasumik oqaatigineqartarmat utoqqaanerusut ukiukinnerpaallu annerpaamik ulorianartorsiorsinnaasut, taamaattumik kissarneqarlutik inuunerliortut piaartumik saaffiginnittariaqartut.
Narsami nakorsaaneq Kent Kleinschmidt oqarpoq oqaatigineqartutut napparsimalersup piaarluinnartumik napparsimaviliarneratigut peqqissisitsinissaq periarfissagissaarnerpaajusoq taamaappallu Narsami napparsimavik pisariaqartunik nakorsaataateqartoq, sinerissamilu oqaatigineqartutut nalaataqarunik sapinngisamik piaarnerpaamik nakorsiartariaqartut.
