Napparsimasut angallanneqarnerat akitsorpallaarnavianngilaq

Arctic Umiaq Line-p sinersortaatai januaarip aallaqqaataanit angallassiunnaassagaluarpata napparsimasunik angallassinernut aningaasartuutit amerleriassapput, timmisartuussinerit amerlissammata.

Dronning Ingridip Napparsimmavissuani pisortaq, Jens Møller Jensen, oqarpoq angallassinernut aningaasartuutit annerpaamik 1,5 millioni koruuninik amerleriassasut.

- Napparsimasut umiarsuarmik angalanneqartut tassaanngillat pinasuartumik nakorsarneqartussat. Naatsorsuutini tunngavigineqarpoq napparsimasut taakku 80 procentii ajornaquteqanngitsumik timmisartumik imaluunniit qulimiguulimmik angallanneqarsinnaasut.

Angallanneqartussat sinneri Pilersuisup umiarsuaataat assartuutit atorlugit angallanneqarsinnaapput, Jens Møller Jensen oqarpoq.

Jens Møller Jensenip erseqqissaatigaa angallassinernut aningaasartuutit ataatsimut isigalugit amerleriarnavianngitsut, sinerissamiit Nuummukartartut sivikinnerusumik angalasassammata.

Silaannakkut angallanneqartut amerleriarnerisa Air Grenlandimit aqunneqarsinnaassanersoq akisinnaannginnerarlugu Jens Møller Jensen oqarpoq, apeqqutaasorli tassaavoq Air Greenlandip timmisartuutai amerlissanersut.

Siusinnerusukkut Air Greenlandimit ilisimatitsissutigineqareerpoq timmisartut amerlineqarnavianngitsut, aqqutissalli amerlineqassasut.

Nuummi Dronning Ingridip Napparsimmavissuani pisortaq Jens Møller Jensen oqarpoq, Air Greenlandimit neriorsuutigineqarsimasoq ilaasussat amerlippata billetit akii 25 procentinik appartinneqarumaartut.