Napparsimasunut siunnersortit tarnimikkut nappaatillit ikiortalissagaat

Inatsisissatut siunnersuut ’ Tarnimikkut nappaatilinnik kiffaanngissusiiaasarneq allatullu pinngitsaaliisarneq pillugit Inatsisartut inatsisaat’ ullumi oqaluuserineqassaaq.

Inatsisissatut siunnersuummi allassimavoq inuk tarnimigut nappaatilik pinngitsaaliissummik napparsimavimmut unitsinneqartillugu napparsimasunut siunnersortimit immikkut akissarsiaqartinneqartumit siunnersorneqarluni ikiorneqartalissasoq.

Massakkut periuseq malillugu napparsimasup pinngitsaaliissummik unitsinneqarnerani kredsdommerip toqqagaanik nakkutiginnittoqartarpoq, amerlanertigut nakkutiginnittuutitaq napparsimasumut ilaqutaasarpoq kredsdommerimit toqqarneqarsimasoq.

- Napparsimasut pinngitsaaliissummik iliuuseqarfigineqartut tapersersorneqarnerisa ikiorneqarnerisalu annertuumik pitsanngorsaavigineqarnissaat, suleqatigiissitap aqutsisullu pisariaqarsoraat. Inunnit piginnaasalinnit arlaannaannulluunniit attuumassuteqanngitsunit, inuttut inatsisitigullu tapersersorneqarnissaq pisariaqartinneqarpoq, inatsisissatut siunnersuummut nassuiaammi taama allaqqavoq.

Suleqatigiissitap inatsisissamut siunnersuumminni siunnersuutigaat inuit qulit napparsimasunut siunnersortitut sulisinneqassasut. Tarnimikkut nappaatilinnut pinngitsaaliissummik napparsimavimmut unitsitsinerit Dronning Ingridip Napparsimavissuani  tarnimikkut nappaatilinnut immikkoortortaqarfimmi kisimi pisinnaassasoq inatsimmut siunnersuummi allaqqavoq, taamaattumik napparsimasunut siunnersortit Nuummi najugaqartuunissaat siunnersuutigineqarpoq.

-Kalaallit Nunaanni ukiumut inuit 56-it missaat pinngitsaaliissummik napparsimavimmut unitsinneqartarmata siunnersuisoqatigiit amerlassusaat tamatumunnga naapertuussorineqarpoq, taama inatsisissatut siunnersuummut nassuiaammi allaqqavoq.

Tarnimikkut napparsimasoq pinngitsaaliissummik napparsimasimavimmut unitsinniarneqartoq Nuup avataaniippat taava napparsimasunut siunnersortip oqarasuaatikkut nalunaaquttap akunnerisa 24-it ingerlaneranni napparsimasoq oqaluuttussaassavaa. Pinngisaaliissummik napparsimavimmut unitsitaasoq Nuummiippat taava napparsimasunut siunnersuisoq nalunaaquttap akunnerisa 24-it ingerlannginneranni unitsitaasimasoq pulaarlugu siunnersussavaa. Tamanna pereerpat pisariaqartitsineq apeqqutaalluni siunnersuisoq aggertassaaq, minnerpaamik sapaatip akunneranut ataasiarluni napparsimasoq qanoq innersoq takusartassallugu.

http://www.inatsisartut.gl/dvd/EM2012/pdf/media/571469/pkt128_em2012_fri...