Napparsimasunut nalunaarsueriaaseq elektroniskinngorpoq
Napparsimasunut pappiaqqat atorlugit nalunaarsueriaaseq atorunnaarlugu, nalunaarsueriaaseq nutaaq, elektroniskiusoq, Nuummi Ilulissanilu napparsimmaveqarfinni maanna atugaalereerpoq.
Taamaattoq suli aaqqitassaqarpoq, illoqarfinnimi taakkunani marlunni qarasaasiat nalunaarsuinermut atorneqartut programmitai assigiinngilluinnarmata.
- Qarasaasiat taakku atorlugit oqaloqatigiittoqarsinnaanngilaq, taamaattumik programmit atorneqartussat assigiittariaqarput, Nuummi nakorsaq, Carsten Pedersen, oqarpoq.
Taanna erseqqissaavoq nakorsianut uninngasunulluunniit nalunaarsueriaatsit elektroniskimik ingerlanneqalerpata isumannaannerujussuanngussasut.
Pappiaqqat atorlugit nalunaarsukkat tamarmik amusarissamiiginnarput, nakkutigineqanngikkunillu kimilluunniit tiguneqariaannaapput.
Qarasaasiat programmitaanik nutarterinerit maanna aallartereerput, Nuuk siulliuteriarlugu sinerissamut siammariartuaartinneqassalluni.
Sunalu tamarmi pissusissamisut ingerlariarpat, sinerissami napparsimaveqarfinni tamani pappiaqqamut nalunaarsuinerit tamarmik qarasaasiamut nussorneqapput, aappaagulu ukiup naalernerani aatsaat tamarmik naammassineqarumaartut, Carsten Pedersenip ilimagaa.
