Napparsimasunut ataqatigiissaarisoqarneq iluatsilluartoq

- Nakorsiartarnerit amerlasuut ataqatigiissaarisoqarnerani sivikillisimapput, nakorsiap Kalaallit Nunaanni peqqinnisaqarfimmeersuunera  ingerlaannaq allattaratta. Taamaalillutillu tamarmik naluneq ajorpaat, pineqartoq siusissumik piffissalerneqartussasoq, Hanne Abild Meyer nassuiaavoq.

Taanna Rigshospitalimi kalaallinut nakorsianut 2006-imiilli ataqatigiissaarisuuvoq. Suliai tamarmik uuttorneqarsinaanngillat, kisianni nakorsianut sivisuumik utaqqisariaqartunut 32-nut 2009-mi utaqqineq ullunik agguaqatigiisillugit 4,5-inik sivikillineqarpoq, 2010-milu nakorsianut 24-nut utaqqineq ullunik agguaqatigiisillugit 6,1-inik sivikillineqarluni.

- Rigshospitalip pisortaqarfianiit erseqqissumik nalunaarutaavoq Kalaallit Nunaannilu Peqqinnissaqarfimmut erseqqissumik isumaqatigiissutaalluni, nakorsiat Kalaallit Nunaanneersut immikkut ajunngitsumik pineqartasut.

-Tassalu nakorsiat maaniitinneqartarneranni angalaniarnikkut immikkut atugassaqarneq aningaasartornarneruneralu eqqarsaatigisassagigut. Soorunamilu nakorsiartitsinerit sapinngisamik piareersarluarneqarsimanissaat, pimoorussaanissaat eqaatsumillu suliaanissat anguniarlugu tamaviaartarpugut, Hanne Abild Meyer oqarpoq.

Naallu nakorsiat nunatsinneersut taamaalillutik nakorsianit Danmarkimeersunit siulliunneqartaraluartut, Nunatsinneersunut ataqatigiissaarisoq, Rigshospitalimi immikkoortoqarfinnit paasilluarneqartartoq, taanna nangippoq.

- Nakorsiarnerit ukua siulliunneqartariqarnerat pillugu akuttunngitsumik tunngavilersuisariaqartarpunga, kisianni pissutsit qanoq ataqatigiinnerannik nassuiaakkaagakkit paasinnittarput.

Peqqissutsimut Naalakkersuisoqarfimmi psiortap, Ann Birkekær Kjeldsenip, kalaallinut nakorsianut ataqatigiissaarisoqarnera iluarisimaaqaa, taamaattoqanngissinnaaneralu ullumi takorloorsinnaanngilluinnarpaa.

-  Nukissarpassuarnik sipaaruttarpaatigut. Tassami uninngatitsineq ullukkaarlugu akeqarpoq, Taakkualumi ullunik marlunnik, pingasunik arfineq marlunnilluunnit ikilisissinnaagaanni, peqqinnissaqarfik sipaaruteqartarpoq, nakorsiaq sivikinnerusumik mulusarpoq napparsimanerlu sivikinnerusarluni.

Taamaammat tamanna tamatigut isumaqaqaaq. Taamaammat ataqatigiissaarisoqanngissinnaanera takorloorsinnaanngilarpulluunniit, Ann Birkekær Kjeldsen oqarpoq.

Kalaalit nakorsiat ukiut tamaasa 700-it 1000-illu akornanniittut Rigshospitalimut passunneqariartortarput.
Rigshospitalimi nakorsiarnut nuantsinneersunut ataqatigiissaarisoqarnera Namminersorlutik Oqartussat aningaasalersorpaat.