Napparsimaruluttut oqartussaasunit puigorneqarsimasutut misigisimapput

Nunatsinni naparsimarulullutik Danmarkimut sivisuumik katsorsartikkiartortut politikkikkut oqartussaasunit puigorneqarsimallutik misigisimapput. -Maannakkut pisariaqalerpoq pingaarnersiunermi pingaarnerutinneqalernissarput, atukkavut ullumikkumit pitsaanerulersinniarlugit ikiorserneqartariaqaleratta, taama oqarpoq sisamanik meeralik kræfteqarluni maannakkut Københavnimi Kalaallit Napparsimasut Illuani najugalik, Batseba Alsing Maniitsumeersoq.
aggustip 08-at 2007 17:19

- Atugaqarpunga imatut oorit ooriinnaagaluartut marloriarlunga nammineq akilerlugu nunatsinnukartariaqarnikuuvunga. Kræfteqarlunga katsorsartinnera sapaatip akunneri marlukkaarmata nammineq akilinngikkukkit nukittorseriartorlunga angerlalaarnissannut periarfissaqannginnama, Batseba Alsing oqarpoq, nagipporlu:

- Politikerit politikeriupput, inuinnaassusertik aamma puigortaramikku. Napparsimalertinnani paasisassaanngissusia uppernarsingaarakku, neriungaarpunga politikerit aamma sukkulluunniit nappariaannaammata, suliffitsik imaannaanngitsoq iluaqutigalugu, taama imaannaanngitsigisunik atugallit ilungersuullugit sullinniarlisigik, tusarnaaginnarnerat naammaleqaaq, Batseba Alsing oqarpoq.

Taanna aperaarput, napparsimasut Danmarkimukartinneqartartut salliutillugit suliniarneq annertusiniartariaqarnersoq, akivorlu:

-Tassami salliutissinnaasaat amerlagaluaqaat, kisianni aamma innuttaaqataalluta, allatulli napparsimalertarluta, pinngitsoorata maaniinngikkutta, angerlaannarutta toqusussaalluta, angerlaannarusukkaluaqaanga, kisianni nalunngilara angerlaannaruma toquinnariartussallunga, nalunngilarali nukangasunik perortitassaqarlunga, toquinnarusunnginnama naammagittarlunga pissutsit atorpakka, uffa pissusit maani atukkat isiginiarneqalaarunik ajunginnerujussuusinnaagaluartut.