Napparsimallutik sulinngittariariaqartartut Danmarkimi aamma ajornartorsiutaapput

Napparsimallutik sulinngittariaqartartut Danmarkimi aamma ajornartorsiutigineqarput. Post Danmarkimi siulersuisut aalajangerput sulisut ukiup ataatsip ingerlanerani annerpaamik ullut marluk napparsimallutik sulinngittariaqarsimasut akornanni 2,3 milliuuni koruunit makitsinikkut eqqugassanngortinniarlugit.
Allattoq Mads Lynge
januaarip 23-at 2008 12:28

Suliffinnili avatangiisit pillugit ilisimatuup, Peter Haslep periuseq taanna iluaqutaassangatinngilaa.

Sulisunut taamatut neqitsiiniarneq eqqarsarnartoqartippara, sulipilunnerpaammi napparsimakkajunnerusarmata makitseqataanissaminnullu taamaalillutik neriuuteqarsinnaanatik. Suliffeqarfinnili sulisut napertuilluartumik pineqartarnerat, suliffinni avatangiisit eqqarsaatigalugit sulisunit pingaartinneqarnerusarpoq tamannalu sulerusussuseqarnermut aamma sunniuteqartarpoq. Annilaanngatigineqarsinnaavoq sulisut sulipiloornerpaat neqitsiunneqartunit agguagassarsinissatik neriuutigisinnaannginnamikku, naapertuilluartumik pineqartutut misiginatik sulilluarnissartik soqutigivallaarunnaaraat. Sulinngitsoortarnerit annikillisassagaanni sulisorisaq paasitinneqartariaqarpoq suliffimmut sunniuteqarluartoq suliaalu iluarisimaarneqartut. Tassa suliffiup iluani ulluinnarni susassaqaqatigiinneq sunneqatigiittarnerullu pitsaasuutinnissaa pingaarnerpaapput, suliffinni avatangiisit pillugit ilisimatooq, Peter Hasle oqarpoq.

Namminersornerullutik Oqartussat Suliffeqarfiit pillugit qullersaqarfianniit nalunaarusiap tupaallannartup takutippaa, Kalaallit Nunaat ataatsimut isigalugu sulisut napparsimallutik sulinngittariaqartarnerat inuiaqatigiinnut ukiumut 370 milliuuni koruuninik naleqartartoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq