Napparsimalluni sulinngitsoortarneq inuiaqatigiinnut akisoqaaq

Inuussutissarsiornermut Pisortaqarfimmit nalunaarusiami tupaallannartumi Kalaallit Nunaanni suliffeqarnermi napparsimalluni sulinngitsoortarneq maannakkorpiaq inuiaqatigiinnut 370 millioni koruunit sinnerlugit akeqartoq naliliisoqarpoq.
januaarip 23-at 2008 05:28

Napparsimalluni sulinngitsoortarneq, 6 procentit missaaniittutut nalilerneqartoq, procentinut tamanut, tassalu 62 millioni koruuninik, naleqartussatut missiliuunneqarpoq.

Tamanna Inatsisartunut ilaasortap Demokraatineersup, Jens B. Frederiksenip, ajuallaatigaa. Taanna isumaqarpoq ajornartorsiutip tamatuma suliarineqalernissaanut piffissanngortoq, taamaattumillu Naalakkersuisunut allakkatigut saaffiginnissuteqarluni, allakkaminilu Naalakkersuisunut apeqqutigalugu, siornatigut neriorsuinermissulli taakkua Suliffigissaasunut saaffiginnissimanersut?

Tamatumunnga peqatigitillugu Jens B. Frederiksenip aamma napparsimalluni sulinngitsoortarnerup ajornartorsiutaanerata sammineqarnerulernissaanut Suliffigissaasut sunik suliniuteqarnersut paaserusuppaa.

- Suliffeqarfinni ileqqorissaarnissap pitsaanngitsup, naammassisaqarsinnaanitsinnik unammillersinnaassuseqarnitsinnillu ajornerulersitsisup, akueriinnarnissaanut akissaqanngilluinnarpugut, Inatsisartunut ilaasortaq Jens B. Frederiksen allappoq.