Napparsimaleriataarneq kinguaattoortitsivoq

Air Greenlandip Københavnimiit Kangerlussualiarnissaa ullumi kinguaattoorpoq, nalunaaquttap akunnerini aappaa qiteqqullugu kingusinaarluni tikissangatinneqalerluni.
Allattoq Najaaraq Egede
decembarip 09-at 2010 08:50

Sisamanngornermi Boeing 757- attartugaq atorlugu timmisartuussisoqassaaq

Timmisartoq ullumi Københavnimiit nal. 9 aallartussaagaluaq maannakkorpiaq aappassaa sermiiaammik seqqartarneqarpoq, qaqugorpiarlu aallarnissaa nalunarallarpoq.

Timmisartoq sermiiaammik seqqartarneqareerluni aallarnissamut piareereersoq ilaasut ilaat napparsimaleriataarpoq. Timmisartorlu ilaasoq niusinnaajumallugu ikiartortarfimmut uterpoq, aallannginnerminilu isumannaallisaaneq peqqutigalugu sermiiaammiik seqqartaqqinneqartariaqarluni. Københavnimilu annertuumik aputeqarnera peqqutigalugu sermiiaammik seqqartartinniarneq utaqqinarluni, taamaattumik Air Greenlandip timmisartup qassinut aallarnissaa oqaatigisinnaanngilaa.

Nittartakkami airgreenland.gl-imi takuneqarsinnaavoq, timmisartorsuaq Kangerlussuarmut nalunaaqutaq ataasinngulerpat mittussaagaluartoq, kisianni pingasunut qiteqqutilerpat aatsaat tikissaaq, sisamat qeqqariartornerani Københavnimut utissalluni.

Aqagumut timmisartuussinissat maannamut allannguuteqanngikkallarput, timmisartorsuulli kingusinaarluni tikinneranik peqquteqartumik kinguaattoortoqarnissaa naatsorsuutigineqassaaq.

Ilaasussat ilaqutaasullu aallarfissat tikiffissallu www.airgreenland.gl-kkut malinnaavigisinnaavaat.