Nappaatit tunillaattartut pillugit ataatsimeersuarput
Nakorsat 75-t peqataassapput taakkunannga affaat Kalaallit Nunaanni nakorsatut atorfeqarput. Ataatsimeersuarneq ulluni pingasuni ingerlanneqassaaq nappaatillu tunillaattartut assigiinngitsukkuutaat Kalaallit Nunaannilu nappaatigineqartartuusut oqallisigineqarlutillu paasissutissiissutigineqassapput. Nappaatit tamakku qanoq ilillugit ajunnginnerusumik katsorsarneqarsinnaanerat qanorlu ilillugit paasititsiniutigineqarsinnaanerat oqallisigineqassalluni.
Nappaatit tunillaattartut ilaatigut makkuupput, tupakuluusi, tingullunneq, HIV kiisalu klamydia.
Nappaatit taakku nunatsinni nappaatigineqakulasuupput, taamaattumillu Dronning Ingridip napparsimaviata Danmarkimi Statens Serumintitut-i suleqatigalugu nakorsat niviarsiallu katillugit 43-t Kalaallit Nunaani sulisuusut katersortinneqarnissaat sulissutigisimavaat.
- Nappaatit tamakku pillugit ilisimatuussutsikkut paasisat kingulliit oqaluttuarineqassapput. Qanoq ilillugit katsorsarneqarsinnaanerat aammalu qanoq paasititsiniutigineqarsinnaanerat oqaluttuarineqarluni, aaqqissueqataasoq Seruminstitut-imi nakorsatut atorfilik Anders Koch taama radioaviisimut oqarpoq.
Taanna nangilluni erseqqissaavoq naatsorsuutigigini ataatsimeersuarnerup kinguneriumaaraa Kalaallit Nunaanni nakorsaqarfik nappaatinut ilisimasaqarnerulerumaartoq aammalu nappaatinut tunillaattartunut kuppilersuinerulerumaartoq.