Nappaatip siaruaannera ataatsimiissutigaat
Ataatsimiinnissaq sioqqullugu tusatsiarneqarpoq, suliniaqatigiiffik ukiuni 40-ni siullermeerluni, nunarsuatsinni nappaammik tunillaassuuttoqarneranik nalunaaruteqarniartoq, Tuluit Nunaannit BBC taama nalunaarpoq. Nappaat Nunarsuatsinni tunillaassuuttutut isigineqalertarpoq, Nunarsuup immikkoortuini marlunni inuit akornanni tunillaassuutileraangat.
WHO-p nalunaarsugai najoqqutaralugit nunani assigiinngitsuni 74-ini H1N1-imik tunillatsissimasut 27.737-upput. Taakkunannga 141-t toqqutigereerpaat.
Düsseldorfimi atuarfimmi 27-nik tunillatsittoqarsimasoq, Tysklandimi oqartussat uppernarsarpaat. Atuarfik matoqqatikkallarneqartoq atuartullu nappaat pissutigalugu mattussaasut oqaatigineqarpoq.
Danmarkimi Peqqinnissamut Qullersaqarfimmit oqaatigineqarpoq, nukappiaraq arfinilinnik ukiulik Vejlep eqqaaneersoq tunillanneqarsimasoq. Nukappiaraq USA-mut angalanerup kingorna napparsimalerpoq. Tunillatsissimanerali suli paasineqartinnagu meeqqerivimmiissimavoq. Taamaattumik meeqqerivimmi meeqqat sulisullu nappaammut illersuummik Tamiflu-mik katsorsarneqarput, tassa tunillaassuunnissaa pinngitsoorniarlugu. Nukappiaraq Odense Universitetshospitalimi allanut attaveqaqqusaanani uninngatinneqartoq, Danmarkimi H1N1-imik tunillanneqartut qulissaraat.
