Nappaatip nualluutip tunillaassuunnera ulorianartorsiortitsivoq
WHO-p nalunaaruteqarnera aallaavigalugu Danmark maannakkut upalungaarsimalerpoq, nappaatillugu Danmarkimi nappaatigineqalersinnaaneranut piareersimalerluni aviisi politiken taamatut allaaserisaqarpoq.
WHO-imi pisortaq Margaret Chan oqarpoq, nappaammik tunillaassuuttumik mianersoqqussuteqarneq fase 4-mit fase 5-mut sakkortusineqassasoq aalajangersimallugu.
Nunarsuaq tamakkerlugu tunillaassuuttumik nappaat pandemi-mik taaguuteqartinneqartarpoq, ulorianarnerpaagaamilu fase 6-imiitinneqartarpoq, 6-imiikkaangami tunillaasuunneq nunarsuarmi tamarmi ulorianartorsiorfiusarluni. Mexico-mi nappaatip tunillaassuuttup aallaavigisaani, suliffeqarfiit niuertarfiit inuillu amerlasuut ornittagaat pisortanit matuneqarput, taamaallaat nakorsaataarniarfiit aningaaseriviit napparsimaviit niuertarfiillu nerisassanik tuniniaaviusut kisimik ammartinneqarlutik. Mexico-mi politiit sakkutuullu sulisinneqarput. Matoqqatitsinerit maajip ulluisa tallimaata tungaanut matoqqassasut aalajangiunneqarpoq, tunillaassuunneq unitsinniarlugu.
Nappaatip Europamut siaruartinnginnissaanut EU piareersimavoq. EU kommission-mi mi peqqinisssaq atuisullu pillugit pisortaq Robert Madelin oqarpoq nualluutip akiuussutissaa ullut 100-it qaangiuttinagit pigilerneqarumaartoq.