Nappaateqaraluaqaluni ilinniarnertuunngortoq
Soraarummeerlunimi qallunaatut misilitsimmat A-mik angusaqarpoq, tassalu Nuummi GU-ttut akornanni angusarissaarnerpaat ilagalugu ilinniarnertuunngorluni. Ninili novembarimili Rigshospitalimut unitsitaavoq, nammineerlunilu ilinniartutut taamanerniilli ingerlasariaqarsimalluni, tassa naammassissaguni fagit tamavimmik soraarummeerfigisariaqarsimallugit.
Ninip anaanaa Sara panini napparsimalermalli najortuarsimavaa, soraarummeerlunilu angusimmat soorunami tussunngullunilu tulluusimaarpoq:
- Qanorluunniit oqassallunga nalungajappara. Ataqatigiissimavugulli ullullu ataasiakkaarlugit ingerlaniarsarisimalluta. Maannakkorpiarli soorlu sinnatuaqiinnartunga, ilumoornersorlu imminut aperisariaqarlunga. Nini-p anaanaa Sara taama oqarpoq.
Ninilliuna soraarummeernera Københavnip Kalaallit Illuata akulerunneratigut pisinnaanngorsimasoq. Taamaammat Kalaallit Illuutaani ilinniartunut siunnersuisartoq Pia Rosing Heilmann Ninimut suliamik qanimut malinnaasimasoq soraarummeermat tussunngusunut akuulluni malinnaaqataaffigisimavaa:
- Ninip angujumasaanik piviusunngortitsiniarnermi ikiuussinnaasimagama assorsuaq tulluusimaarutigaara. Ninimummi suliaq sapaatit akunnerit kingulliit arfinillit pingaarnerpaatut inississimavarput. Soraarummiilermammi allaanngilaq uanga Ninimut anaanaasunga, anaajullunga imaluunnit atsaallunga pisangaqataangaarama. Pissangaqataariillarlunga soraarummeerniariarmat tupinnanngitsumik nuannaaqataaqaanga. Pia Rosing Heilmann oqarpoq.
Nini Tessingip aammigut kræfternerata katsorsarneqarnera ullumi naammassineqarpoq. Sulili Københavnimiittariaqarallassaaq, aavatigummi kræfternera ilumut nungunneqarsimanersoq nakorsat qulakkeeqqaarusummassuk.
Nini Tessingip soraarummeernersiortinneqarnissaa aqagu Københavnimi Kalaallit Illuutaata aaqqissuussaanik ingerlanneqalerpat uagut KNR-imiit malinnaajumaarpugut. Aamma Ninip soraarummeerniarluni ilungersorsimanera pillugu aallakaatitassiaq maani KNR-ip radioatigut aallakaatikkumaarparput.
