NAPP-mi imminnut illersorusupput
Aalisarnermut inatsisissap iluani allassimasoq, tassa qanorluunniit inuutissarsiuteqarneq apeqqutaanani aalisartunngortoqarsinnaanera, Nuummi Aalisartut Piniartullu Peqatigiiffiannit isorineqarpoq.
Lars P. Mathæussen Nuummi Aalisartut Piniartullu Peqatigiiffianni oqaaseqartartoq Lars P. Mathæussen oqarpoq aalisarnermut inatsisissami aalisarnermik piginnittussaanerup avammut niuerutiginiarneqarnera allanngortittariaqartoq. Inuit Ataqatigiinni ilaasortat aalisartut tallimanngornermi oqaloqatigaat, ataatsimeeqatigeereernerup kingorna Lars P. Mathæussen ima oqarpoq:
- Inatsisartunut ilaasortat aalisakkanik avammut niuertutut isigilerpagut, taanna unitsinneqartariaqarpoq. Pisuussutivut nunatsinniissapput uagut avammut niuerutigissavavut, aalisariutinik piginnittussaaneq nunanut allanut nuunneqannginnissaa siunniusimavarput, Lars P. Mathæussen oqarpoq.
Nuummi aalisartut Inuit Ataqatigiinni ilaasortanik ataatsimeeqateqaqqammerput.
Piniartut aalisartullu neriupput isumartik IA-p partiiata gruppiani tigulluarneqarumaartoq.
Inuit ataqatigiinni aalisarnermut tunngassuteqartunik oqaaseqartartoq, Hans Aronsen oqarpoq, piginneqatigiiffiit pilersinneqarpata nunatta iluani aalisarneq immini akilersinnaanerulertussaasoq.
- Uanga taama isumaqanngilanga kinaluunniit pigisaminik piginneqateqarnissaminut isumaqatigiissuteqarsinnaavoq. Aalisarneq pillugu inatsisissami aalisartut piginneqatigiiffinnik piginneqateqalersinnaanerminnik pinngitsaalineqanngillat, aamma aalisartut nunatsinni piginneqatigiiffinnik piginneqataasinnaanerat ammaaffigineqarnikuuvoq. Piginneqatigiit aalisartunit pigineqartut tunisassiortuupput, aalisartuullutik tigooqqaasuullutillu taamaattumik taakkua unammilleruminaatsorujussuarmik aalisartunik peqateqarlutik aalisariutaannik tigooqqaasuupput, taakkua inatsisip illuatungilertussaavai aamma allat nunatta iluaninngaanneersut periarfissillugit, taamaalilluni unammilleqatigiinneq annertusisussaavoq nunatta iluani taamaalillunilu aalisarneq immini aamma akilersinnaanerulertussaalluni, Hans Aronsen oqarpoq.
Nuummi aalisartut partiit sinneri aamma oqaloqatigaat.
