Assi: KNR

Napasumi umiatsiamik angut ajunaarpoq

Angut 20-t qiteqqullugit ukiulik tallimanngornerup unnukkuani nunaqarfimmi Napasumi umiatsiakkut ajunaartoq, politiit ilisimatitsipput.

 

Tallimanngornermi unnukkut angut inuusuttoq 20-t qeqqanni ukiulik Napasup eqqaani umiatsiamik ajunaarnermigut inuunini annaavaa, taama politiit KNR-mut nalunaarput.

Angut inuusuttoq Napasumeersoq 20-t sinnerlugit ukiulik tallimanngormat ajunaarpoq.

Brian Thomsen, Kalaallit Nunaanni politiini pigaartoq taama ilisimatitsivoq.

Taanna nangilluni nassuiaavoq, tallimanngonermi unnukkut aqqarngup qeqqata missaani pisoq pillugu politiit kalerrinneqarsimasut. Politiilli ajunaarnerup qanorpiaq pisimanera pillugu itinerusumik oqaaseqarfigerusunngilaat.

Angutip ilaqutai kalerrinneqareerput.

 

Paamiuni angut aallaasersortoq tigusarineqarpoq

Taamatuttaaq politiit Paamiuni maannakkorpiaq pisumut allamut tunngatillugu paasiniaaleruttorput. Ullaaq mannami Paamiuni politiit angut aallaasersortoq tigusaraat.

Politiit ullaaq nalunaaqutaq 7.23 kalerrinneqarput, illoqarfiup iluani angut aallaasilik angalaarluni inuit tungaannut illunullu umeqattaartoq.

20 minutsillu ingerlanerani pissanganartorsiutigerujussuanngikkaluarlugu angut politiiniit tigusarineqarsimasoq, Brian Thomsenip oqaluttuaraa.

- Aallaaserluni illoqarfimmi angalaarpoq inuillu tungaannut illunullu umertarluni. Ilungersuuterujussuanngikkaluarlugulu tigusaraarput, taanna oqaluttuarpoq, nangipporlu:

- Inunnit oqaatigineqaraluarpoq igeriarsimasoq, kisianni igissimanngilaq aammalu inunnik ajoqusertoqarani, Brian Thomsen oqarpoq.

Politiit maannakkorpiaq killisiuipput, ullullu ingerlanerani aalajangissavaat, pisoq pillugu parnaarussinissamut tunngavissaqassanersoq.

Unnuaq naallugu politiit ulapputtut

Nuna tamakkerlugu ullup unnuallu ingerlanerani politiit ulapissimaqaat.

- Unnuap ingerlanerinnaani politiinut nalunaarutigineqartut 83-iupput, amerlasoorujussuuppullu, Brian Thomsen erseqqissaavoq.

Taanna nassuiaavoq, nalunaarutigineqartut amerlanerpaat imigassartorsimanermut attuumassuteqartuusut.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl