Napasumi tunitsivik aamma matuvoq
Atammimmi Royal Greenlandip tunitsivia matusoq tusaqqammerparput. Nunaqarfimmi allami avannaatunginnguaniittumi Napasumi Arctic Green Foodip tunitsivia ippassaq aamma tunitsivigeqqusaajunnaarpoq, oqartoqarluni qaammatini pingasuni tullerni matoqqassasoq. Pingaartumik nipisat suaasa tunisaalernissaat qanillisoq eqqarsaatigalugu matusineq tamanna akuersaarneqarsinnaanngilluinnartoq, Nunaqarfimmi Aqutsisut siulittaasuat Gerth Platou oqarpoq.
-Assorsuaq ajortumik kinguneqartussaavoq, aalisarnermik inuussutissarsiuteqartunut taavalu nunami suliareqqiisartutut suliffeqartunut. Inuuniarnikkut assorsuaq sunniuteqarnerluttussaavoq, Gerth Platou oqarpoq.
Nunaqarfimmiut namminneq ingerlatsilernissaat eqqarsaatigisinnaaneraat aperigatsinni ima akivoq:
- Aa, tassami taanna matusisoqartillugu eqqaaneqartuartarpoq. Kisianni nunaqarfimmiuusugut ajornartorsiutitta annerpaarpartarivaat ingerlatsivinnut angisuunut imaluunniit anngajaanut tigusinissamut qanoq ilioriusissamik paasisimasaqaqqalaarluinnarnerput - aallartinnermi kipusoortoqarujussuassanngippat, Gerth Platou oqarpoq.
Qaammatini pingasuni Napasumi tunitsiviup matoqqanissaa eqqarsaatigalugu ernumasoqarpoq.
- Nipisat suai siulliit marsip naajartulernerani tunineqartarput. Tunisineq maani matoqqassagaluarpat aalisartunut iluaqutsiinngitsuussaaq, oqarpoq.
Taamaammat ilungersortumik naalakkersuisut piaartumik iliuuseqaqqullugit kaammattorpaat.
- Tunitsiviit nunaqarfinniittut piffissaagallartillugu ingerlaqqinnissaat pingaartuuvoq. Aammami Atammimmi Royal Greenlandip tunitsivianut tunisineq tallimanngormat naggataarpoq. Atammimmiunut aalisarnikkut inuuniarneq nunami immamilu inuuniarneq ajortorujussuarmik kinguneqarsinnaavoq. Naalakkersuisoq piaartumik qanoq iliuuseqarnissaa kajumissaatigerusunnarpoq.
Namminersornerullutik Oqartussat Arctic Green Foodimut aningaasaliissutigisartagaat 17 millioni koruuniniit 8 millioninut 2009-mut aningaasanut inatsimmi appartinneqarput. Arctic Green Foodimi pisortat kissaatigisimagaluarpaat, nunaqarfinni tunisassiorfiit matunnginniassammata isumaqatigiissutip januaarip naggataani atorunnaannginnerani nutaamik isumaqatigiissusiornissartik. Sulili tamanna pisimanngilaq.
