Napasumi aalisakkanik tunitsivik nutaaq ammalersoq

Qeqqata Kommuniani nunaqarfiit minnersaat, Napasoq Maniitsup kujataaniippoq. Nunaqarfik qeqertaarannguusoq 85-inik innuttaasoqarpoq.

Sumiiffimmi tassani saarullinniarnissaq periarfissaavoq.

Napasumilu aalisartut saarullittaminnik nunaqarfimminni tunisisinnaanngulerput.

Platou Fish Napasoq Aps-immi tunitsivik nutaaq januaarip ulluisa 15-ianni tallimanngornermi ammassavaa.

Pisortap, Hans Platoup oqarnera naapertorlugu tamanna nunaqarfimmi aalisartunut nutaarsiassatsialaavoq.

- Napasumi aalisartut ajunnginnerusumik atugassaqartitaalernissaat siunertaavoq. Maniitsoq Atammik ilaatigullu Nuuk kisiisa tunisassiorfissatut periarfissaarinikuuvaat. Aalisartut angalaqqaarlutik niusisinnaapput. Ukiukkut ukiakkullu atoruminaatsorujussuusarpoq. Piffissarujussuaq aamma atortaramikku, Hans Platou oqarpoq.

Taanna nunaqarfimmi tassani inunngorsimavoq, taassumalu Napasumi tunisisinnaanissamut periarfissat pitsaanerusut maqaasisimavai.

Taamaammat taassuma ilaquttani Platoukkut sinneri peqatigalugit tunitsiveqalernissamut siorna februaarip qaammataani pilersaarusiulerput.

- Sukkanerujussuarmik pilersaarut ingerlanissaa naatsorsuutaagaluarpoq, kisianni pappiliarsornerujussuit allarpassuillu peqqutaallutik kinguaattuulaarpoq. Aamma pissusissamisoorpoq taanna.

- Napasoq siunissami patajaannerusumik inuttusiartorlunilu suliffeqarfiillu amerliartorlutik ingerlajartulernissaa neriuutigaarput. Suut tamarmik ineriartortillugu. 

Tunitsivimmi saarulliit aallaqqaammut tunineqarsinnaassapput. Tunitsiviup saarulliit panertuliareriarlugit Brugsenimut Pisiffimmullu tunisassiariniarpai.

Platou Fish Napasoq Apsip nipisat, tuttut umimmaallu siunissami aamma tunineqarsinnaalernissaat neriuutigaa.

Platou Fish Napasoq ApS-imi piginnittut arfiniliupput. Taakkulu tassaallutik Hans Platou, Juaanna Platou, Inger Platou, Niels Platou, Kunuk Platou aamma Mads Petersen.

Aalisakkanik tunitsivik ukioq kaajallugu ammasassaaq. Tassanilu aasaanerata kingorna sisamanik sulisoqartarnissaa naatsorsuutigineqarpoq. Aasaanerani tunitsivimmi sulisut arfiniliusassasut Hans Platoup naatsorsuutigaa.