Napaattuup oqartussaaffigisimasai agguaanneqassapput
Ineqarnermut, Attaveqarnermut, Avatangiisinut Pinngortitamullu Naalakkersuisoq Siumumeersoq Jens Napaattooq ingerlaannaq atuutilersumik ippassaq tunuarpoq.
Jens Napaattuup Naalakkersuisut siulittaasuannut Hans Enoksenimut allakkamini tunngavilersuutigaa, piffissami kingullermi nammineq inuttut sammineqarnerujussuani, angalasarnermini aningaasartuutigisartakkani tamatumalu kingunerisaanik ilassinninnermut tunngatillugu aningaasartuutigisartakkami qulaajarneqarnerat.
Radioavisip Nuuk TV suleqatigalugu ippassaq tusarliuppaa, Jens Napaattuup 410.000 koruunit ilassinnissutinut siorna atorsimagai, ilaatigut cigaretinut, asaatinut, nunatsinni Danmarkimilu unnuaannakkut imerniartarfilerinernut allaallu atisaajarluni isiginnaartitsisarfinnut atorsimagai.
Tusagassiutitigut sammineqartut Jens Napaattuup tunngavissaqannginnerarpai naapertuilluartuunnginnerarlugillu. Naalakkersuisunili suliat ima pingaaruteqartiginerarpai, politikkikkut anguniagarisimasatik nammineq pissutigaluni maangaannaq unittariaqaratik.
Jens Napaattuup tunuarniuteqarnera Naalakkersuisut siulittaasuata ingerlaannaq akueraa, naalakkersuisullu ullumi ataatsimiissapput, Jens Napaattuup oqartussaaffigisimai agguaanneqassallutik, kinalu naalakkersuisunngussanersoq aamma oqaluuserineqassaaq.
